Fjár­hags­vand­ræði Barcelona aftur í brenni­depli eftir fall úr Meistara­deildinni

Síðasta sumar var mikið rætt og ritað um fjárhagsstöðu Barcelona. Félagið var á barmi gjaldþrots en með því að selja framtíðina tókst Joan Laporta, forseta félagsins, að rétta úr skútunni.

Laporta taldi sig ekki aðeins vera að rétta úr skútunni heldur var hann að breyta henni í lúxussnekkju. Öll umræða í kringum félagið var á þá leið að nú væri Barcelona snúið aftur eftir mögur tímabil. Segja má að undarlegar ákvarðanir á leikmannamarkaðnum hafi spilað hvað stærstan hluta í falli Börsunga en liðið var byggt upp á ofdekruðum prímadonnum sem skiluðu litlu sem engu inn á fótboltavellinum.

Þó félagið hafi fest kaup á nokkrum ágætum leikmönnum í sumar þá virðist sumarglugginn í ár hafa verið jafn illa undirbúinn og undanfarin ár. Því til sönnunar má benda á að félagið íhugar nú að losa sig við Franck Kessi í janúar en miðjumaðurinn kom á frjálsri sölu frá AC Milan í sumar.

Þegar Bayern München mætti á Spotify Nývang í Katalóníu í gærkvöld var vitað að Barcelona gæti ekki komist í 16-liða úrslit keppninnar sem það þráir svo heitt að vinna. Slæm úrslit gegn Inter Milan gerðu það að verkum að Börsungar voru fallnir niður í Evrópudeildina, annað árið í röð.

Að vilja vinna Meistaradeildina er eitthvað sem öll stærstu lið Evrópu dreymir um. Ólíkt til að mynda París Saint-Germain og Manchester City sem eiga fúlgur fjár þá þarf Barcelona að vinna Meistaradeildina, eða svo gott sem. Öll þeirra fjárhagsáætlun byggir á því að komast langt í keppninni því hún skilar hvað mestum pening í kassann.

Annað lýsandi dæmi fyrir ömurlega stefnu félagsins í leikmannamálum er það að Barcelona skuldar yfir 100 milljónir evra, rúmlega 14 milljarða íslenskra króna, vegna kaupa á þremur leikmönnum sem eru ekki lengur á mála hjá félaginu.

Philippe Coutinho er í dag leikmaður Aston Villa, markvörðurinn Neto er hjá Bournemouth og Miralem Pjanić er kominn til Sameinuðu arabísku furstadæmanna. Það sem meira er, Barcelona þarf að greiða þessar 100 milljónir innan næstu sjö mánaða.

Samkvæmt Börsungum varð félagið af 12 milljónum evra við það að falla úr leik í Meistaradeildinni á síðustu leiktíð en talið er að upphæðin sé enn hærri í ár. Þá hefur þetta gríðarleg áhrif á ímynd Barcelona en yfirlýst markmið félagsins fyrir þetta tímabil var að vinna La Liga, spænsku úrvalsdeildina, og komast í 8-liða úrslit Meistaradeildar Evrópu.

„Ef við gerum ekki eitthvað þá munum við tapa 200 milljónum evra ár hvert,“ sagði Eduard Romeu, varaforseti fjármálasviðs félagsins, um núverandi strúktúr félagsins. 

Þarna telur The Athletic að Romeu sé í raun að benda á að félagið verði að koma vel launuðum leikmönnum af launaskrá félagsins en sem stendur eru leikmenn á borð við Jordi Alba og Gerard Piqué að kosta félagið 40 milljónir evra á ári þó þeir spili varla mínútu.

Romeu telur að staða félagsins verði ekki „eðlileg“ fyrr en tímabilið 2024 til 2025. Þangað til verður það að troða marvaða fjárhagslega og það virðist nokkuð langt þangað til Barcelona verði aftur á toppi heimsfótboltans. Þangað til þurfa þeir að horfa öfundaraugum á erkifjendur sína í Real Madríd sem virðast ekki stíga feilspor þessa dagana.