Veður

„Veður­spáin lítur ekki vel út“

Viktor Örn Ásgeirsson skrifar
Snarvitlaust veður er víðsvegar á landinu. Myndin er úr safni.
Snarvitlaust veður er víðsvegar á landinu. Myndin er úr safni. Vísir/Vilhelm

Rauð viðvörun vegna veðurs hefur nú tekið gildi á Austfjörðum. Gert er ráð fyrir ofsaveðri með vindhviðum allt að 45 metrum á sekúndu. Hættustig almannavarna hefur verið virkjað og björgunarsveitir fyrir austan eru í viðbragðsstöðu. Almannavarnir hafa biðlað til almennings um að hjálpa þeim að koma skilaboðum um hið slæma veður til ferðamanna.

Gert er ráð fyrir því að veðrið verði verst fyrir austan en appelsínugular eða gular viðvaranir eru í gildi á nánast öllu landinu. Slæmt veður var víðast hvar í nótt en lögreglan á höfuðborgarsvæðinu segir að hlutir hafi fokið í öllum hverfum. Sama er upp á teningnum annars staðar á landinu, að frátöldum Vestfjörðum

Búið er að loka veginum frá Kirkjubæjarklaustri að Fáskrúðsfirði og björgunarsveitir á Austurlandi fylgjast grannt með færðinni. Sveinn Halldór Oddsson Zoega, formaður aðgerðarstjórnar björgunarsveita á Austurlandi, segir fjallavegi sérstaklega varasama.

„Veðurspáin lítur ekki vel út. Það er spáð mikilli veðurhæð og miklum vindi aðallega. Um leið og það hvessir mikið þá er að kólna og það gæti jafnvel orðið snjókoma og slydda á fjöllum. Þannig að það er enn minni ástæða til að vera á ferðinni, að minnsta kosti milli staða,“ segir Sveinn Halldór.

Fólk komi skilaboðunum til ferðamanna

Töluverður fjöldi ferðamanna er á ferð um landið og hafa Almannavarnir beðið landsmenn um að koma skilaboðum um hið slæma veður áleiðis.

„Það eru auðvitað kannski síst þeir sem verða varir við aðvaranir frá okkur – eða veðurspár. Það er áskorun að reyna að koma þessum skilaboðum til ferðamanna,“ segir Sveinn Halldór.

Sveinn Halldór kveðst ekki alveg tilbúinn að lýsa yfir því að veturinn sé hafinn, en segir þetta klárlega fyrstu haustlægðina. 

„Þetta er nú óvenjuskörp byrjun á haustinu. Það var 20 stiga hiti hérna í gær og fínasta veður, og búið að vera mestallan september. Þannig að þetta kemur ansi kröftuglega, en mér sýnist á veðurspá að það muni skána þegar líður á vikuna. En það er að koma haust og vetur, menn þurfa að sætta sig við það,“ segir Sveinn Halldór.

Tilmæli til fólks eru klassísk: Huga að lausamunum og sleppa ferðalögum að óþörfu.

Er veturinn kominn?

„Þetta er fyrsta haustlægðin, það er alveg á hreinu. Ég ætla nú ekki alveg að lýsa yfir vetri strax en segjum að það sé komið haust,“ segir Sveinn Halldór.

Fylgst er með nýjustu vendingum í veðri í vaktinni á Vísi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.