Tónlist

Stuðlabandið springur út í Brasilíu

Dóra Júlía Agnarsdóttir skrifar
Hljómsveitin Stuðlabandið er farið að vekja athygli í Brasilíu.
Hljómsveitin Stuðlabandið er farið að vekja athygli í Brasilíu. Aðsend

Hljómsveitin Stuðlabandið vakti athygli á Kótelettunni nú í júlí þegar þeir tóku hið sígilda barnalag Í larí lei og allt ætlaði um koll að keyra en atriðið var tekið upp á myndband sem birtist á vefsíðunni Youtube. Lagið er upphaflega gefið út af brasilísku tónlistarkonunni XUXA og heitir Ylarie en í kjölfar óvæntrar atburðarrásar birti hún myndbandið af Stuðlabandinu á Instagram síðu sinni. Blaðamaður heyrði í Fannari Frey meðlim Stuðlabandsins.

„Myndbandið var birt hér á Vísi og fékk ótrúlega góðar viðtökur. Út af því fór það að berast lengra og lengra út í heim þangað til að einhver í Brasilíu sá það,“ segir Fannar.

Fannar Freyr Magnússon.Aðsend

Í kjölfar þess fór Stuðlabandið að taka eftir örlítilli athygli frá Brasilíu á Instagram síðu sinni sem vatt aldeilis upp á sig.

„Síðan fjölgaði skilaboðunum umtalsvert með hverjum klukkutímanum og svo sprakk þetta í gær þegar Xuxa sjálf setti myndbandið inn á Instagramið sitt. Síminn minn varð batteríslaus vegna tilkynninga á Instagram. Okkur finnst þetta svo fyndið og vitum í raun ekki hvað er í gangi. 

Þetta er einhver snjóbolti sem er kominn í gang og nú eru brasilískir fjölmiðlar byrjaðir að hafa samband við okkur í gríð og erg. 

Við þorum varla að opna inboxið okkar á Instagram því við höfum ekki undan að svara fólki.“ 

Athugasemdirnar eru allar á jákvæðu nótunum og skrifar einn notandi sem dæmi „Brasilía elskar þetta! Frábært!! Drottningin XUXA!“ 

Hvernig líður ykkur með þessa óvæntu og skemmtilegu athygli frá Brasilíu?

Þetta er bara eitt það skemmtilegasta en jafnframt það óvæntasta sem við höfum lent í. Við vissum að þetta væri gamalt og vinsælt brasilískt barnalag en við gerðum okkur held ég engan vegin grein fyrir hversu vinsælt lagið er þarna úti í raun og veru og hversu sterk tengsl heimamenn hafa við lagið. Mikið af fólki er að skrifa við myndbandið að þetta hafi verið lag æsku þeirra og það geri þau svo stolt að sjá það síðan komið hingað til Íslands 24 árum síðar og hversu stórt það er hér. 

Þetta myndband virðist vekja upp miklar tilfinningar hjá brasilísku vinum okkar og þess vegna eru viðbrögðin svona svakaleg.

Væruð þið til í að skella ykkur út og halda tónleika? Jafnvel taka þetta á sviði með XUXA?

Auðvitað! Við erum þvílíkir aðdáendur og það væri algjör heiður og draumur að fá að stíga á svið með henni. Það er nú þegar búið að hafa samband við okkur frá brasilískum sjónvarps og útvarpsstöðvum sem hafa mikinn áhuga á álinu. Einhverjir þaðan hafa viðrað þá hugmynd að fá Stuðlabandið á tónlistarhátíðina Rock In Rio sem er haldin ár hvert í Rio De Janeiro. Þannig hver veit? Stuðlabandið á Rock In Rio 2023?

Hafið þið eitthvað spjallað við XUXA í kjölfar þessarar birtingar á Instagramminu hennar?

Nei en við vonum þó að samtalið muni eiga sér stað von bráðar. 

Þá ætlum við að bjóða henni að koma til Íslands og spila með okkur á Þjóðhátið 2023. Hversu klikkað væri það?

Við viljum svo í lokin senda ástar og þakkarkveðjur til Siggu Beinteins en það er einmitt hún sem á heiðurinn á því að hafa fært okkur Íslendingum lagið sjálft á sínum tíma þegar hún gaf það út með íslenskum texta eftir Ómar Ragnarsson á plötunni Flikk-Flakk árið 1998. Án hennar hefðum við hljómsveitin aldrei uppgötvað þetta frábæra lag!


Tengdar fréttir

„Þegar við tókum síðan Í larí lei þá ætlaði allt um koll að keyra“

Hljómsveitin Stuðlabandið var að senda frá sér myndband frá Kótelettunni 2022 þar sem þeir taka lagið Í larí lei, sem Sigga Beinteins gerði ódauðlegt árið 1998 og er að finna á plötu hennar Flikk Flakk. Nú 24 árum síðar er lagið að ná nýjum hæðum og virtust tónleikagestir hæstánægðir með þetta lagaval Stuðlabandsins, þar sem allir sungu hátt og snjallt með.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.