Innviðaráðherra segir aðgerðir gegn þenslu ekki bitna á framkvæmdum

Kristján Már Unnarsson skrifar 8. júní 2022 22:20

Sigurður Ingi Jóhannsson innviðaráðherra og formaður Framsóknarflokksins í viðtali við Stöð 2 síðdegis. Sigurjón Ólason

Ríkisstjórnin boðar aðgerðir til að mæta þenslu í hagkerfinu. Innviðaráðherra segir að þetta muni ekki bitna á neinum framkvæmdum.

Fjallað var um málið í fréttum Stöðvar 2 en niðurskurður framkvæmda við innviði er jafnan með því fyrsta sem kemur upp í hugann þegar fjármálaráðherra boðar aðgerðir gegn þenslu í hagkerfinu, sem tilkynnt var um eftir ríkisstjórnarfund í dag. Við spurðum ráðherra innviða í hverju aðgerðirnar fælust.

„Það gerum við með nokkrum aðgerðum, sem er verið að fjalla um núna í þinginu, í fjárlaganefnd. En það er þó þannig að það mun ekki koma niður á framkvæmdastigi í nokkurri framkvæmd,“ svarar Sigurður Ingi Jóhannsson innviðaráðherra.

Frá vegagerð á Dynjandisheiði síðastliðið sumar. Lónfell í baksýn.Vegagerðin

Hann segir aðgerðir bæði snúa að tekju- og útgjaldahlið án þess að vilja fara nánar út í efnisatriði. Spurningar vakna samt um hvort fresta eigi nýjum útboðum, eins og breikkun Reykjanesbrautar.

„Nei, við höfum sett ákveðna hluti í forgang. Menn hafa væntanlega tekið eftir því að Dynjandisheiði er nýlega búið að bjóða út, þrettán kílómetrar, sem stóð jafnvel til að gera ekki, fyrr en seinna.

Það sama gildir um Reykjanesbrautina. Það eru mál sem eru í forgangi.“

-En hvað með jarðgöng til Seyðisfjarðar?

„Þar er líka fjármagn tilbúið í samgönguáætlun. Þannig að það er hvergi verið að skera niður fjármagn.“

-En verður því útboði seinkað?

„Ég sé það ekki fyrir mér í augnablikinu, nei.“

Frá framkvæmdum við Landspítalann.Stöð 2/Skjáskot

Sigurður Ingi segir þetta birtast fremur þannig að ekki verði bætt í og að framkvæmdafé, sem af ýmsum ástæðum hafi ekki verið unnt að nýta, svo sem vegna mannaflaskorts eða kærumála, verði sett til hliðar.

„Við höfum sett verulegt umframfjármagn til byggingar á nýjum Landspítala miðað við það sem menn hafa getað framkvæmt á hverju ári. Það eru líka fullt af öðrum opinberum framkvæmdum sem eru í gangi. Við verðum bara að sjá hvað er hægt að gera. Í þensluári verður þú að geta stigið á bremsuna.“

Hann tekur fram að aðgerðirnar verði bara á árinu 2023.

-En hvað er þetta stór pakki? Geturðu nefnt einhverja stærð í milljörðum?

„Hann er allavega nægilega stór til þess að hafa áhrif,“ svarar innviðaráðherra.

Hér má sjá frétt Stöðvar 2:

Efnahagsmál Alþingi Ríkisstjórn Katrínar Jakobsdóttur Vegagerð Landspítalinn

Tengdar fréttir

Vegagerðin býður út langan vegarkafla á Dynjandisheiði

Þrettán kílómetra langur vegarkafli á hæsta hluta Dynjandisheiðar verður boðinn út á morgun. Samtímis er Vegagerðin að skoða málamiðlun að nýju vegstæði við fossinn Dynjanda til að hlífa sem mest bæði landslagi og fornminjum.

1. júní 2022 22:44

Ljúka breikkun Reykjanesbrautar milli Hafnarfjarðar og Njarðvíkur

Langþráð breikkun Reykjanesbrautar milli Straumsvíkur og Hvassahrauns er á leið í útboð og stefnt að því að fimm milljarða króna framkvæmdir hefjist um mitt sumar. Með verkinu lýkur tvöföldun leiðarinnar milli Reykjavíkur og Suðurnesja.

27. apríl 2022 22:22

Fyrsta skóflustunga að nýju bílastæða- og tæknihúsi nýs Landspítala

Willum Þór Þórsson, heilbrigðisráðherra, tók í dag fyrstu skóflustungu að nýju bílastæða– og tæknihúsi nýs Landspítala, ásamt Pétri Guðmundssyni stjórnarformanni Eyktar og Runólfi Pálssyni forstjóra Landspítala. Þá tóku fulltrúar starfsmanna, þær Rannveig Rúnarsdóttir frá Landspítala og Þórana Elín Dietz frá HÍ einnig skóflustungu að húsinu.

19. maí 2022 13:57

130 milljarða halli á ríkissjóði

Afkoma ríkissjóðs var neikvæð um 130 milljarða króna í fyrra samanborið við 144 milljarða króna halla árið 2020. Ber hún þess merki að hagkerfið hafi enn verið að ná sér á strik eftir heimsfaraldur Covid-19 en afkoman var betri en áætlað var.

31. maí 2022 16:18

Verðbólga átta prósent á þessu ári og sex prósent stýrivextir

Verðbólga mun ná hámarki í haust þegar hún verður rúmlega 8% en lækka síðan aftur, ef marka má nýja hagspá Hagfræðideildar Landsbankans. Þá muni stýrivextir halda áfram að hækka og ná 6% í lok þessa árs. Gert er ráð fyrir því að hagvöxtur verði töluverður og atvinnuleysi haldi áfram að minnka samhliða því.

19. maí 2022 10:01

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.