Tónlist

„Undirmeðvitundin er stundum svo mikið með á nótunum að hún er langt á undan manni“

Dóra Júlía Agnarsdóttir skrifar
Benni Hemm Hemm sendir frá sér nýja plötu.
Benni Hemm Hemm sendir frá sér nýja plötu. Aðsend

Tónlistarmaðurinn Benni Hemm Hemm gefur út breiðskífu miðvikudaginn 8. júní. Platan, sem ber titilinn Benni Hemm Hemm & the Melting Diamond Band III, er þriðja platan sem kemur út úr samstarfi hljómsveitarinnar við Mengi Records. Hún kemur út á stafrænu formi og á vínyl en einnig eru gefin út vídeóverk með öllum tónverkunum. Útgáfu plötunnar verður fagnað með tónleikum í Mengi samdægurs, miðvikudagskvöldið 8. júní. Blaðamaður tók púlsinn á Benna.

Hvaðan kemur innblásturinn fyrir þessu verkefni?

Þetta verkefni rúllaði upphaflega í gang eftir risa innblástur sprengju sem ég lenti í þegar ég bjó á Seyðisfirði fyrir nokkrum árum. 

Það var svo mikil sprengja að allar vinnuaðferðir mínar breyttust, helst á þann veg að ég hætti alveg að hugsa og setti alla orku og allan tíma í að spila og taka upp. 

Þess vegna eru form og lengd verkanna alveg óplönuð og ég þarf bara að hlýða því sem gerist og vinna með það. Til dæmis má nefna að eitt verk á þessari plötu er fjórar mínútur og annað 21 mínúta.

Benni Hemm Hemm & the Melting Diamond Band III.Aðsend

Hefur breiðskífan verið lengi í bígerð?

Þessi breiðskífa er hluti af útgáfuröð sem við erum að vinna með Mengi Records, sem er mjög spennandi að púsla saman. Ég hef unnið að þessum verkum frá því á Seyðisfirði eins og ég tók fram áðan, sem var kannski fyrir fjórum, fimm árum. En svo bæti ég hægt og rólega inn í lögin og fæ fólk í stúdíóið til að bæta inn pörtum, svo hún hefur verið mallandi í nokkur ár.

Hvernig gekk að yfirfæra tónverkin á sjónrænt form?

Það gekk ágætlega, takk, eða ég vona það. Mér finnst mjög skemmtilegt að fá fólk sem kann að gera myndbönd til þess að vinna þennan hluta með mér, en í þetta skiptið gerði ég þau öll sjálfur og vona bara að þau séu ágæt. Eins og ég tók fram áðan, þá liggur ekki mikil hugsun eða skipulag á bakvið þá vinnu frekar en tónlistina. En undirmeðvitundin er stundum svo mikið með á nótunum að hún er langt á undan manni, þannig að ég treysti þessu ferli ágætlega núorðið.

Hvað finnst þér skemmtilegast við að skapa og vinna í tónlist?

Eins og ég lýsi hér að ofan, með því að hugsa sem minnst og gera sem mest. Þá finnst mér auðvelt að vinna og útkoman er yfirleitt betri.

Hvers mega gestir vænta á útgáfutónleikunum?

Gestir mega vænta rólegs og huggulegs spuna sem er spiluð eins og popptónlist. Og svo verðum við með vídeóin, sem ég held að eigi eftir að koma skemmtilega út. Huggulegheit og spennandi spuni, söngur og falleg vídeó, það er það sem við getum búist við.


Tengdar fréttir






Fleiri fréttir

Sjá meira


×