Innlent

Lögmannsstofa, grunuð um misferli, var helsti bakhjarl handboltaliðs á lygilegri uppleið

Snorri Másson skrifar

Grunur leikur á um að Innheimtustofnun hafi greitt félagi í eigu forstöðumanns stofnunarinnar á Ísafirði í kringum fjörutíu milljónir króna í þóknanir vegna þjónustu, sem átti ekki að útvista yfirleitt. Félagið er síðan helsti styrktaraðili handknattleiksdeildar Harðar, sem hefur vaxið ævintýralega á örfáum árum.

Fjallað var um mál Innheimtustofnunar og handknattleiksdeildar Harðar í kvöldfréttum Stöðvar 2 í kvöld. Innslagið má sjá hér að ofan.

Grunur vaknaði þegar Ríkisendurskoðun skoðaði málið

Þegar fréttir bárust af því í desember að æðstu stjórnendur Innheimtustofnunar hefðu verið sendir í leyfi vegna gruns um misferli vissu líklega fæstir hvað Innheimtustofnun var. Eðlilega kannski, stofnunin á eiginlega bara samskipti við foreldra vegna meðlags. En Innheimtustofnun er ekki lítið batterí, það innheimti til dæmis um 3,4 milljarða króna af foreldrum bara árið 2020.

Stofnunin er í eigu sveitarfélaganna, en undanfarin ár hefur verið stefnt að því að færa hana yfir til ríkisins. Þegar starfsfólk stofnunarinnar á Ísafirði tregaðist við að liðka fyrir því ferli, var ákveðið að láta Ríkisendurskoðun gera úttekt á starfseminni. Þar kom ýmislegt upp úr dúrnum og ekki leið á löngu þar til forstöðumaður stofnunarinnar hafði verið kærður til lögreglu.

Málið var talið svo alvarlegt að héraðssaksóknari sendi tíu menn vestur á firði til að gera húsleit hjá stofnuninni. Sama dag gerðu þeir einnig húsleit hér í Reykjavík.

Bragi Axelsson, fyrrverandi forstöðumaður Innheimtustofnunar á Ísafirði, var vikið úr starfi vegna gruns um misferli. Þar leikur grunur á um að hans eigin lögmannsstofu Officio hafi verið greiddar þóknanir vegna innheimtustarfa. Officio er helsti bakhjarl handknattleiksdeildar Harðar, sem hefur átt ævintýralega góðu gengi að fagna undanfarin ár.Vísir/Samsett

Tugir milljóna

Þrír hafa réttarstöðu sakbornings í rannsókn saksóknara. Forstjóri stofnunarinnar, Jón Ingvar Pálsson, forstöðumaður stofnunarinnar, Bragi Axelsson, og einn annar starfsmaður stofnunarinnar.

Bragi Axelsson lögmaður hefur verið forstöðumaður Innheimtustofnunar frá 2010. Samkvæmt upplýsingum fréttastofu leikur grunur á um að lögmannsstofa hans, Officio ehf., hafi á síðasta eina og hálfa ári tekið í kringum fjörutíu milljónir í þóknanir fyrir innheimtu sem hún innti af hendi fyrir stofnunina. 

Þar fyrir utan er Bragi talinn hafa átt annað félag, sem annaðist erlenda innheimtu fyrir stofnunina. Allt er þetta til rannsóknar og enn óljóst um lögmæti þessara viðskipta.

Officio helsti bakhjarl liðs í miklum vexti

En hvað gerir Officio ehf. við tugi milljóna króna?

Verulegir fjármunir hafa alla vega ratað til handknattleiksdeildar íþróttafélagsins Harðar á Ísafirði. Á treyjum félagsins er Officio helsti bakhjarlinn. Kannski ekki að undra, þegar eigandi lögmannsstofunnar var sjálfur formaður handknattleiksdeildarinnar, Bragi Axelsson sem sagt. Samkvæmt upplýsingum fréttastofu er hann ekki lengur formaður deildarinnar.

Annað fyrirtæki í eigu Braga, fasteignasalan Kofi, er einnig stuðningsaðili félagsins.

Uppgangur handknattleiksdeildar Harðar á undanförnum árum hefur verið ævintýralegur og það sem virðist vera blómlegur fjárhagur vekur athygli. Árangurinn lætur ekki á sér standa, lið skipað níu erlendum leikmönnum vann sig í vor upp í deild þeirra bestu, Olísdeildina.


Tengdar fréttir

Fleiri með réttarstöðu sakbornings

Fleiri en þrír eru með réttarstöðu sakbornings í tengslum við rannsókn héraðssaksóknara á máli tengt Innheimtustofnun sveitarfélaga eru með réttarstöðu sakbornings. Þrír voru handteknir vegna málsins á dögunum.

Húsleit og handtaka á Ísafirði

Embætti héraðssaksóknara réðst í morgun í umfangsmiklar aðgerðir á Ísafirði í tengslum við rannsókn á máli tengt Innheimtustofnun sveitarfélaga. Að minnsta kosti einn hefur verið handtekinn og farið í húsleit í bænum.

Fyrst sendir í leyfi og nú sagt upp störfum

Jóni Ingvari Pálssyni, forstjóra Innheimtustofnunar sveitarfélaga, og Braga Axelssyni, forstöðumanni stofnunarinnar á Ísafirði, hefur verið sagt upp störfum. Uppsagnirnar koma í kjölfar þess að þeir voru sendir í leyfi en Ríkisendurskoðun hóf úttekt á verkefnum Innheimtustofnunar síðastliðið haust.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.