Enski boltinn

Ten Hag búinn að finna átta sem hann getur treyst hjá United

Ingvi Þór Sæmundsson skrifar
Erik ten Hag hefur verk að vinna þegar hann kemur á Old Trafford í sumar.
Erik ten Hag hefur verk að vinna þegar hann kemur á Old Trafford í sumar. getty/Patrick Goosen

Erik ten Hag, verðandi knattspyrnustjóri Manchester United, er búinn að sigta út átta leikmenn liðsins sem hann getur treyst. Þá hefur hann trú á Harry Maguire þótt hann hafi átt afar erfitt uppdráttar í vetur.

Ten Hag yfirgefur Ajax eftir tímabilið og tekur við United af Ralf Rangnick. Hollendingurinn fær það erfiða verkefni að koma United aftur á toppinn eftir mögur ár síðan Sir Alex Ferguson settist í helgan stein.

Búist er við því að miklar breytingar verði á leikmannahópi United í sumar. Enskir fjölmiðlar greina frá því að Ten Hag horfi til átta leikmanna í hópnum sem hann getur treyst og byggt í kringum.

Meðal þeirra er Maguire. Enski landsliðsmaðurinn hefur ekki spilað vel á þessu tímabili en Ten Hag ku hafa trú á honum og ætlar að finna miðvörð sem getur spilað vinstra megin til að auðvelda Maguire lífið.

Rangnick hefur sagt að United þurfi allt að tíu nýja leikmenn, þar á meðal tvo til þrjá framherja. Hann hvatti hins vegar Ten Hag til að halda Cristiano Ronaldo, langmarkahæsta leikmanni United á tímabilinu.

United er í 6. sæti ensku úrvalsdeildarinnar. Liðið mætir Brighton og Crystal Palace í síðustu tveimur leikjum sínum á tímabilinu.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.