Paul Ince hefur áhyggjur: Segir leikmenn Man. United vera út um allt

Ralf Rangnick er sestur í stjórastólinn hjá Manchester United og var fljótur að breyta yfir í sinn leikstíl. Byrjunin hefur ekki verið upp á marga fiska og sérstaklega ekki í samanburði við byrjun Antonio Conte með Tottenham liðið sem hefur gerbreyst á örskömmum tíma eftir að Ítalinn tók við.

Leikurinn í gær var sjötti leikur Manchester United undir stjórn hins þýska Ralf Rangnick en í fyrsta sinn sem liðið tapar undir hans stjórn. Fram að því hafði United unnið þrjá leiki og gert tvö jafntefli.

Fyrir aðeins nokkrum dögum vann liðið 3-1 heimasigur á Burnley en að þessu sinni var liðið bæði markalaust og stigalaust á móti liði sem var neðar í töflunni.

Paul Ince var í settinu hjá Sky Sports ásamt Jamie Redknapp og þeir fóru yfir frammistöðu Manchester United á heimavelli sínum í gær.

„Það er virkileg ástæða til að hafa áhyggjur af stöðu mála. Sjáið bara hvað Conte hefur gert á stuttum tíma hjá Tottenham í bara sjö eða átta leikjum,“ sagði Paul Ince.

„Rangnick er búinn að fá fimm leiki núna en ég sé ekki hvað þeir eiga að vera að gera. Þeir eru út um allt,“ sagði Ince.

„Þeir hafa enga trú á þessu og treysta ekki hverjum öðrum. Þeir eru fyrst og fremst að spila sem einstaklingar. Þegar Bruno Fernandes kom inn á völlinn þá litum við betur út en við erum bara að vona að þetta lagist,“ sagði Ince.

Það má sjá umræðu þeirra Jamie Redknapp og Paul Ince hér fyrir neðan.