Íslenski boltinn

Sigurður Ragnar: Þessir strákar leystu hlutverkin sín með miklum sóma

Ingvi Þór Sæmundsson skrifar
Sigurður Ragnar Eyjólfsson gekk sáttur frá leiknum gegn FH.
Sigurður Ragnar Eyjólfsson gekk sáttur frá leiknum gegn FH. vísir/hulda margrét

Sigurður Ragnar Eyjólfsson, annar þjálfara Keflavíkur, var ánægður eftir markalausa jafnteflið við FH í Kaplakrika í kvöld.

„Já, mér finnst þetta mjög gott stig á útivelli, sérstaklega þar sem við vorum með lemstrað lið og það vantaði marga leikmenn hjá okkur,“ sagði Sigurður Ragnar í leikslok.

Keflvíkingar stilltu upp ansi óhefðbundinni varnarlínu í kvöld en þrír af fjórum í henni spiluðu aðra stöðu en þeir eru vanir.

„Sumir menn spiluðu út úr stöðu. Helgi [Þór Jónsson] spilaði sem vinstri bakvörður held ég í fyrsta sinn á ævinni. Við erum mjög sáttir með að taka stig og spila vel. Við vorum þéttir í vörninni og fengum okkar færi, mjög góð færi,“ sagði Sigurður Ragnar.

Mikil forföll voru hjá varnarmönnum Keflavíkur eins og stundum í sumar.

„Nacho [Heras] fékk tveggja leikja bann. Maggi [Magnús Þór Magnússon] hefur fengið tvö höfuðhögg á stuttum tíma og verður í burtu í einhvern tíma,“ sagði Sigurður Ragnar.

Hann hrósaði þeim leikmönnum sem þurftu að leysa önnur hlutverk en þeir gera venjulega. „Ingimundur [Aron Guðnason], sem er venjulega miðjumaður, spilaði sem hægri bakvörður og Helgi, sem er venjulega framherji, sem vinstri bakvörður. Þessir strákar leystu hlutverkin sín með miklum sóma,“ sagði Sigurður Ragnar að lokum.


Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.




Fleiri fréttir

Sjá meira


×