Enski boltinn

Varnarmaður Leicester fótbrotnaði eftir ljóta tæklingu í æfingaleik

Ingvi Þór Sæmundsson skrifar
Wesley Fofana var sárþjáður eftir tæklingu Ninos í æfingaleik Leicester City og Villarreal.
Wesley Fofana var sárþjáður eftir tæklingu Ninos í æfingaleik Leicester City og Villarreal. getty/Plumb Images

Wesley Fofana, varnarmaður Leicester City, fótbrotnaði í æfingaleik liðsins gegn Villarreal í gær og verður líklega lengi frá keppni. Leicester vann leikinn, 3-2.

Í seinni hálfleik tæklaði framherjinn Nino Fofana illa og með þeim afleiðingum af dálksbein í fæti franska varnarmannsins brotnaði. Fofana var borinn af velli og fékk súrefni.

Fofana staðfesti í gær að dálksbeinið hefði brotnað en það kæmi í ljós eftir nánari skoðun hvort hann hefði meiðst frekar.

Leicester leitar nú að miðverði til að fylla skarð Fofanas sem lék afar vel fyrir Leicester á síðasta tímabili. Frakkinn tvítugi lék 38 leiki í öllum keppnum og varð bikarmeistari með Leicester.

Félagið keypti hann frá Saint-Etienne á þrjátíu milljónir punda í október á síðasta ári.

Leicester mætir Wolves í 1. umferð ensku úrvalsdeildarinnar 14. ágúst.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.