Erlent

Lögregluþjónar þingsins segja sögu sína: „Þú munt deyja á hnjánum“

Samúel Karl Ólason og Sunna Karen Sigurþórsdóttir skrifa
Lögregluþjónarnir fjórir í myndatöku eftir nefndarfundinn í dag. Frá vinstri: Aquilino Gonell, Michael Fanone, Harry Dunn og Daniel Hodges.
Lögregluþjónarnir fjórir í myndatöku eftir nefndarfundinn í dag. Frá vinstri: Aquilino Gonell, Michael Fanone, Harry Dunn og Daniel Hodges. AP/Bill O'Leary

Yfirheyrslur hófust í dag fyrir rannsóknarnefnd Bandaríkjaþings vegna árásarinnar á þinghúsið í Washington DC í byrjun árs. Lögregluþjónar sem voru á vakt þann dag voru þeir fyrstu sem mættu fyrir þingnefnd sem ætlað er að rannsaka árásina á þinghúsið þann dag.

Þá brutu stuðningsmenn Donalds Trump, fyrrverandi forseta, sér leið inn í þinghúsið með því markmiði að stöðva formlega staðfestingu úrslita forsetakosninganna í fyrra, sem Trump tapaði.

Áhlaupinu hefur verið lýst sem fordæmalausri árás á lýðræðið og hófust yfirheyrslur fyrir rannsóknarnefnd fulltrúadeildar Bandaríkjaþings í dag.

„Sumir reyna að afneita því sem gerðist, hvítþvo það, breyta uppreisnarmönnum í píslarvotta, en allur heimurinn sá raunveruleika þess sem gerðist 6. janúar, gálgana standa þarna fyrir utan þinghúsið, “ sagði Bennie Thompson, formaður rannsóknarnefndarinnar, í dag.

Nefndin leggur áherslu á mikilvægi þess að komast til botns í málinu og vinna gegn skipulegum lygum um atburðarásina sem enn eigi sér stað.

„Við þurfum að vita, mínútu fyrir mínútu, hvað gerðist 6. janúar. Við þurfum að skilja hvernig hin herfilega lygi um 6.janúar hefur haldið áfram að dreifast og næra þau öfl sem vilja grafa undan bandarísku lýðræði. Og við þurfum að finna leið til að bæta skaðann,“ sagði Thompson.

Lýstu ofbeldi og fordómum

Fjórir lögregluþjónar mættu á fund nefndarinnar í dag og voru þeir mjög harðorðir í garð óeirðaseggja sem réðust á þá og Repúblikana sem hafa ítrekað gert lítið úr árásinni og jafnvel neitað því að ofbeldi hafi átt sér stað.

Þá lýstu þeir alvarlegu ofbeldi og kynþáttafordómum sem þeir urðu fyrir.

Meðal lögregluþjónanna var Michael Fanone, sem sagði frá því að hann hefði verið barinn, gefið raflost og kallaður svikari. Læknar sögðu honum eftir á að hann hefði fengið vægt hjartaáfall í átökunum, samkvæmt AP fréttaveitunni.

Hann sagði að þegar hann var dreginn úr varnarlínu lögregluþjóna af óeirðaseggjum hefði hann verið meðvitundarlaus í um það bil fjórar mínútur. Nokkrir hefðu reynt að ná byssunni af honum og jafnvel lagt til að skjóta hann með byssunni.

Daniel Hodges sagði óeirðaseggina hafa froðufellt af reiði á meðan þeir krömdu hann milli tveggja hurða og börðu hann í höfuðið með hans eigin kylfu. Hann sagði mann hafa öskrað á sig að hann myndi deyja á hnjánum.

Harry Dunn sagðist ítrekað hafa verið kallaður n-orðinu af óeirðaseggjum þegar hann var að verja inngang þingsals fulltrúadeildarinnar.

Aquilino Gonell sagðist hafa verið fullviss um að hann yrði drepinn af fólkinu sem réðst á þinghúsið og sagði meðal annars frá því að hann hefði næstum því kafnað þegar hópurinn kramdi hann.

Hér má sjá hluta af ræðu Gonell. Þar á meðal þegar hann segist hafa verið nærri því að kafna.

Fulltrúadeild Bandaríkjaþings hafði samþykkt frumvarp um að stofna óháða rannsóknarnefnd til að fara í saumana á árásinni á þinghúsið. Það frumvarp var fellt af Repúblikönum í öldungadeildinni. Forsvarsmenn Demókrata í fulltrúadeildinni, sem eru með meirihluta þar, stofnuðu þá rannsóknarnefnd sem átti að vera skipuð fulltrúum beggja flokka.

Sjá einnig: Repúblikanar felldu frumvarp um rannsókn á árásinni á þinghúsið

Kevin McCarthy, leiðtogi Repúblikana í fulltrúadeildinni, tilnefndi fimm þingmenn flokksins til nefndarinnar en dró tilnefningarnar til baka þegar Nancy Pelosi, forseti fulltrúadeildarinnar, neitaði að veita þeim Jim Jordan og Jim Banks sæti í nefndinni.

Það gerði hún á grundvelli þess að þeir hafa báðir tekið virkan þátt í viðleitni Trumps til að snúa niðurstöðum kosninganna í fyrra og tekið undir innihaldslausar ásakanir forsetans fyrrverandi um að umfangsmikið kosningasvindl hafi kostað hann sigur.

McCarthy og Repúblikanar brugðust reiðir við og dró hann allar tilnefningarnar til baka. Þá hótaði hann því að svipta alla þingmenn flokksins sem sætu í nefndinni öðrum nefndarsætum.

Þrátt fyrir mótmæli forsvarsmanna Repúblikana þáðu þau Liz Chaney og Adam Kinzinger, sem bæði eru Repúblikanar, sæti í nefndinni. Þau hafa bæði verið harðorð í garð Repúblikana vegna stuðnings þeirra við Trump og það að þeir vilji ekki rannsaka árásina, svo eitthvað sé nefnt.

Cheny dró  ekkert undan í málfutningi sínum.

„Ef þeir sem bera ábyrgðina eru ekki látnir sæta ábyrgð og ef þingið bregst ekki við með ábyrgð verður þetta áfram krabbamein í okkar þingbundna lýðveldi. Það grefur undan friðsamlegum valdaskiptum sem eru kjarninn í lýðræðiskerfi okkar. Við munum takast á við ógnina af meira ofbeldi á komandi mánuðum og öðrum 6. janúar á fjögurra ára fresti,“ sagði Cheney.

Sagði fyrst að Trump bæri ábyrgð 

McCarthy sagði upprunalega að Trump ætti sök á árásinni á þinghúsið en snerist svo fljótt hugur. Síðan þá hefur hann gert lítið úr árásinni. Í dag gagnrýndi hann rannsóknina og kallaði hanna sjónarspil. Pelosi vildi bara spyrja eigin spurninga.

Sjá einnig: Repúblikanar leita á náðir Trumps

Hér má sjá Kinzinger ræða við lögregluþjónana sem mættu á nefndarfundinn í dag. Hann hrósaði þeim í hástert og sagði fundinn hafa tekið meira á tilfinningar hans en hann hafi átt von á.

Í samtali við blaðamenn í dag sagði McCarthy að rannsaka ætti Pelosi sjálfa vegna þess hve illa undirbúnir lögregluþjónar hefðu verið fyrir árásina. Þegar hann var spurður um Mitch McConnell, leiðtoga Repúblikana í öldungadeildinni, sem fer með sama vald og Pelosi yfir lögreglu þingsins, hunsaði McCarthy þær spurningar, samkvæmt AP fréttaveitunni.

Lögregluþjónarnir gagnrýndu Repúblikana harðlega á fundinum í dag. Fanone sagði hafa lagt mikið á sig til að verja þingmenn og aðra í þinghúsinu.

„Mér finnst eins og ég hafi farið til helvítis og til baka fyrir þá og fólkið í þessu herbergi,“ sagði Fanone. Hann barði svo í borðið og hélt áfram: „Of margir eru nú að segja mér að helvíti sé ekki til eða þá að helvítið hafi ekki verið svo slæmt í alvörunni.“

Þetta sagði hann vera mikið skeytingarleysi í garð hans og annarra lögregluþjóna.

Ný yfirmaður þinglögreglunnar sendi frá sér tilkynningu undir kvöld þar sem hann lofaði lögregluþjónana fjóra og aðra sem hefðu barist til að „verja lýðræði“ Bandaríkjanna.

Til stendur að halda anna nefndarfund í næsta mánuði. Thompson sagði í dag að vitnum yrði stefnt von bráðar, samkvæmt Washington Post.


Tengdar fréttir

Hefur safnað 9,5 milljörðum króna í sjóð sinn

Save America, pólitísk aðgerðanefnd (PAC) Donalds Trump, fyrrverandi forseta Bandaríkjanna, safnaði um 75 milljónum dala á fyrri hluta þessu árs. Það samsvarar tæplega níu og hálfum milljarði króna, lauslega reiknað.

Sá fyrsti til að vera dæmdur fyrir á­rásina á þing­húsið

Karl­­maður frá Flórída­­fylki var í dag dæmdur í átta mánaða fangelsi fyrir að hafa rutt sér leið inn í sal öldunga­­deildar Banda­­ríkja­þings þegar stað­­festa átti niður­­­stöður for­­seta­­kosninganna í byrjun þessa árs. Hann er sá fyrsti til að hljóta dóm fyrir glæp í tengslum við á­­rásina á þing­húsið.

Höfðu spurnir af á­formum stuðnings­manna Trump vikum fyrir á­rásina

Bandaríska þinglögreglan hafði njósnir af því að stuðningsmenn Donalds Trump forseta ætluðu sér að fara með vopnum í þinghúsið að minnsta kosti tveimur vikum áður en æstur múgur réðst þar inn í janúar. Þeim upplýsingum var þó aldrei komið til lögregluliðsins í framlínunni.

Tugir repúblikana studdu rannsókn á árásinni

Fulltrúadeild Bandaríkjaþings samþykkti frumvarp um stofnun þverpólitískrar rannsóknarnefndar á árásinni á þinghúsið í janúar í gær. Á fjórða tug repúblikana óhlýðnaðist leiðtogum flokksins og greiddi atkvæði með frumvarpinu.

Trump segist stefna aftur á framboð

Donald Trump, fyrrverandi forseti Bandaríkjanna, hefur sagt bandamönnum sínum að hann stefni á að bjóða sig aftur fram til forseta fyrir kosningarnar 2024, verði hann enn við góða heilsu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×