Sá fyrsti til að vera dæmdur fyrir árásina á þinghúsið

Óttar Kolbeinsson Proppé skrifar 19. júlí 2021 23:32

Paul Allard Hodgkins við innrásina í sal öldungadeildar Bandaríkjaþings. AP/Lögregla þinghússins

Karlmaður frá Flórídafylki var í dag dæmdur í átta mánaða fangelsi fyrir að hafa rutt sér leið inn í sal öldungadeildar Bandaríkjaþings þegar staðfesta átti niðurstöður forsetakosninganna í byrjun þessa árs. Hann er sá fyrsti til að hljóta dóm fyrir glæp í tengslum við árásina á þinghúsið.

Saksóknarar höfðu farið fram á átján mánaða fangelsisdóm yfir Paul Allard Hodgkins, sem ruddist inn í þingsalinn ásamt fleirum, með fána Donalds Trump á lofti. Hann var sakaður um að hafa ógnað bandarísku lýðræði.

Paul Allard er 38 ára gamall kranaverkamaður. Hann lýsti yfir sekt sinni í síðasta mánuði fyrir að reyna að koma í veg fyrir opinbera athöfn en hann var ekki sakaður um að ráðast á neinn eða valda skemmdum.

Dómarinn sem kvaddi upp dóminn yfir Paul Allard í dag sagði hann hafa spilað stórt hlutverk í einu versta atviki í sögu Bandaríkjanna.

„Þetta voru ekki mótmæli í nokkrum skilningi. Þetta var árás á lýðræðið,“ sagði dómarinn. „Hún skildi eftir sig blett sem mun sitja fastur á landinu í áraraðir.“

Um 140 særðust í átökunum, þann 6. janúar síðastliðinn. Einn var skotinn til bana og þrír aðrir létust eftir átökin.

Fleiri en fimm hundruð hafa verið ákærðir vegna árásarinnar og má búast við að dómurinn í dag sé fordæmisgefandi fyrir mörg hinna málanna sem á eftir að dæma í.

Árás á bandaríska þinghúsið Bandaríkin

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.