Enski boltinn

Conor segist vera að íhuga að kaupa Man. Utd.

Ingvi Þór Sæmundsson skrifar
Þótt færsla Conors McGregor hafi eflaust verið sett fram í miklum hálfkæringi yrði hann eflaust mun vinsælli eigandi hjá stuðningsmönnum Manchester United en Glazer-fjölskyldan.
Þótt færsla Conors McGregor hafi eflaust verið sett fram í miklum hálfkæringi yrði hann eflaust mun vinsælli eigandi hjá stuðningsmönnum Manchester United en Glazer-fjölskyldan. getty/Jeff Bottari

Írski bardagakappinn Conor McGregor spurði fylgjendur sína á Twitter í gær hvort hann ætti ekki bara að kaupa Manchester United.

Conor skrifaði færsluna í gær þegar fréttirnar um útgöngu ensku félaganna úr ofurdeildinni og væntanlegt brotthvarf Eds Woodward frá United bárust.

United var eitt sex enskra félaga sem voru í hópi stofnmeðlima ofurdeildarinnar. Eftir mikla andstöðu frá stuðningsmönnum félaganna ákváðu þau að draga sig út úr bandalaginu. Eftir standa því sex félög, þrjú frá Spáni og þrjú frá Ítalíu.

Conor sá sér leik á borði í gærkvöldi og spurði fylgjendur sína álits á því hvort hann ætti ekki að kaupa United.

„Hæ allir, ég er að hugsa um að kaupa Manchester United! Hvað segið þið um það?“ skrifaði Írinn til þeirra 8,6 milljóna sem fylgja honum á Twitter.

Conor er stuðningsmaður United enda er írska tengingin við félagið sterk. Conor hafði sérstaklega mikið álit á löndum sínum, Roy Keane og Denis Irwin, sem léku lengi með United.

Conor tapaði fyrir Dustin Poirier í síðasta bardaga sínum í janúar. Hann hefur tapað þremur af síðustu sex bardögum sínum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.