Innlent

Harry Kamian mættur í banda­ríska sendi­ráðið

Eiður Þór Árnason skrifar
Harry Kamian segist hlakka til að kynnast Íslendingum.
Harry Kamian segist hlakka til að kynnast Íslendingum. Skjáskot

Harry Kamian hefur tekið við sem forstöðumaður bandaríska sendiráðsins á Íslandi en Jeffrey Ross Gunter lauk störfum sem sendiherra Bandaríkjanna þann 20. janúar síðastliðinn. Gegnir Kamian þar með stöðu staðgengils sendiherra þangað til nýr hefur verið skipaður í embættið. Greint er frá þessu á vef sendiráðsins en Kamian tók við stöðu forstöðumanns þann 24. janúar.

„Ég er spenntur fyrir því að vera á Íslandi og hlakka til að kynnast landinu og hitta eins marga Íslendinga og hægt er á næstu mánuðum. Ég hyggst dýpka sterkt og árangursríkt samband Bandaríkjanna og Íslands enn frekar,“ er haft eftir Kaimian á Facebook-síðu sendiráðsins.

Fram kemur á heimasíðu þess að Kamian hafi síðast starfað sem varasendiherra og staðgengill fastafulltrúa Bandaríkjanna gagnvart Öryggis- og samvinnustofnun Evrópu frá 2017 fram til ágúst í fyrra. 

Kamian hefur unnið hjá bandaríska utanríkisráðuneytinu frá árinu 2013 og meðal annars unnið í Víetnam, Síle, Tyrklandi, Kúbu og El Salvador. Alls hefur hann starfað í 28 ár við utanríkisþjónustu.

Hann er með mastersgráðu í utanríkisþjónustu frá Georgetown-háskóla og BA-gráðu í alþjóðatengslum og spænsku frá University of California, Davis. Harry er giftur Robin Dunnigan, sem hefur einnig starfað á vegum utanríkisþjónustunnar, og eiga þau saman tvö börn.

Sakaði Fréttablaðið um „falsfréttaflutning“

Jeffrey Ross Gunter, fyrrverandi sendiherra, var tilnefndur af Donald Trump, þáverandi Bandaríkjaforseta, og vakti meiri athygli í starfi sínu hér á landi en margir forverar hans.

Í sumar greindi fréttastofa CBS-sjónvarpsstöðvarinnar frá því að sendiherrann vildi bera byssu á Íslandi og hefði óskað eftir aukinni öryggisgæslu, þrátt fyrir að utanríkisráðuneyti Bandaríkjanna hafi tilkynnt honum að hann væri ekki í hættu.

Í október síðastliðnum sakaði bandaríska sendiráðið svo Fréttablaðið um „falsfréttaflutning“ í færslu á Facebook-síðu sinni. Færslan kom í kjölfar fréttar á vef blaðsins um að starfsmaður sendiráðsins hafi greinst með Covid-19 áður en flutningi lauk í ný húsakynni þess við Laufásveg.

Sendiráðið hafnaði því og sagði íslenskan starfsmann hafa smitast „löngu eftir“ að nýja sendiráðið hefði verið vígt. Fréttablaðið stóð við fréttaflutning sinn en starfsmenn sendiráðsins aftur­kölluðu samdægurs boð miðilsins í hring­borðs­um­ræður í sendi­ráðinu.

Ötull stuðningsmaður Trumps

Fyrir þetta olli Gunter fjaðrafoki þegar hann tísti um „ósýnilegu Kínaveiruna“ í júlí og brugðust margir illa við þeim ummælum hans. Í kjölfarið söfnuðu Bandaríkjamenn á Íslandi undirskriftum og hvöttu íslensk stjórnvöld til þess að vísa sendiherranum úr landi.

Gunter er virkur meðlimur í Repúblikanaflokknum, hefur verið ötull stuðningsmaður Trumps og meðal annars stutt framboð hans fjárhagslega. Hann var fyrir skipun sína reynslulaus sem erindreki en hafði um árabil starfað sem húðsjúkdómalæknir í Kaliforníu.


Tengdar fréttir

Sendi­herrann sendir þakkar­kveðju til Trump, Pence og Pompeo

Jeffery Ross Gunter, sendiherra Bandaríkjanna á Íslandi, tilkynnti á Twitter-síðu sinni í dag að flutningar bandaríska sendiráðsins frá Laufásvegi yfir í nýtt húsnæði við Engjateig hefðu gengið snurðulaust fyrir sig.

Ritstjórinn undrandi og lokað á Fréttablaðið

Ritstjóri Fréttablaðsins segir það vekja furðu að sendifulltrúi erlends ríkis reyni að grafa undan fréttaflutning frjáls fjölmiðils líkt og bandaríska sendiráðið gerði með Facebook-færslu þar sem blaðið var sakað um „falsfréttir“.

Bandaríkjamenn á Íslandi uggandi um atkvæði sín

Tafir hjá bandarísku póstþjónustunni og herferð Donalds Trump forseta gegn póstatkvæðum veldur Bandaríkjamönnum búsettum á Íslandi áhyggjum af því að atkvæði þeirra í kosningunum í næsta mánuði verði ekki talin.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.