Solskjær líkti kvarti Klopps við fræga staðreyndaræðu Benítez

Eftir tapið fyrir Southampton á mánudaginn, 0-1, var Klopp ósáttur við að fá ekki tvö víti og sagði að United hafi fengið fleiri slík á síðustu tveimur árum en Liverpool á fimm og hálfu ári.

Solskjær var spurður út í ummæli Klopps á blaðamannafundi í gær og gat ekki stillt sig um að skjóta aðeins á Þjóðverjann.

„Það er líklega staðreynd. Það er sennilega svarið mitt. Það er staðreynd að við höfum fengið fleiri víti,“ sagði Solskjær og vísaði til frægrar ræðu Rafas Benítez, þáverandi stjóra Liverpool, frá 2009 þegar hann las upp lista af staðreyndum sem sneru að United á blaðamannafundi þegar liðin áttu í harðri baráttu um enska meistaratitilinn.

Solskjær segir að með ummælum sínum sé Klopp að reyna að hafa áhrif á dómara, líkt og Frank Lampard gerði fyrir leik United og Chelsea í undanúrslitum ensku bikarkeppninnar í fyrra.

„Ég get ekki talað fyrir aðra stjóra, af hverju þeir segja svona lagað. Augljóslega fannst mér þetta virka hjá Frank í undanúrslitunum bikarkeppninnar því hann talaði um þetta. Við fengum ekki víti sem við áttum að fá í leiknum svo kannski er þetta leið til að hafa áhrif á dómara,“ sagði Solskjær.

United tekur á móti Manchester City í undanúrslitum deildabikarsins klukkan 19:45 í kvöld. United mætir svo Watford í 3. umferð bikarkeppninnar um helgina áður en liðið etur kappi við Liverpool 17. janúar.