Finnur féll fyrstur úr Bandinu hans Bubba

Bubbi Morthens sendi Finn Bessa fyrstan allra keppenda heim í þættinum sínum Bandið hans Bubba. Fyrsti úrslitaþátturinn var sýndur í beinni á Stöð 2 í kvöld.

Tíu keppendur keppa um þrjár milljónir króna og söngvarastöðu í bandinu hans Bubba. Þriggja manna dómnefnd skipuð þeim Villa Naglbít, Birni Jörundi og Bubba Morthens hrósuðu og skömmuðu keppendur fyrir frammistöðu sína. En Dr. Gunni var gestadómari kvöldsins.

Það voru síðan áhorfendur sem kusu þá sem komust áfram og á endanum stóðu tveir keppendur eftir á sviðinu. Það vour þeir Hjálmar og Finnur Bessi. Drengirnir fluttu framlag sitt aftur og að því loknu sendi Bubbi Morthens Finn Bessa heim.

Á föstudaginn í næstu viku verða því níu keppendur sem berjast um peningana, og söngvarastöðu í Bandinu hans Bubba.