Annar svæfingalæknir segir upp störfum: Stefnir í óhaldbært ástand á gjörgæslu

María Sigurðardóttir, svæfinga- og gjörgæslulæknir, sagði upp stöðu sinni á Landspítalanum í Fossvogi í dag eftir 22 ára starfsferil. Hún segir að ákvörðunin hafi verið mjög erfið en að hún sjái sér ekki fært annað en að segja upp störfum.

„Það er skrýtin tilhugsun að setja sig í þau spor að eiga ef til vill ekki eftir að koma aftur inn á Landspítalann,“ segir María. „Ástandið er orðið grafalvarlegt og ég tel mér ekki fært að vinna samkvæmt þeim launakjörum sem nú eru í gildi.“

Aðeins 6,7 stöðugildi eftir að óbreyttu

Að minnsta kosti tveir svæfinga- og gjörgæslulæknar hafa því sagt upp störfum á spítalanum í dag en í morgun sagði Einar Páll Indriðason Vísi frá uppsögn sinni. Fjóra svæfingasérfræðinga þarf til að manna eina helgarvakt á gjörgæslu en þegar uppsagnir Maríu og Einars taka gildi fyrsta apríl næstkomandi verða aðeins 6,7 stöðugildi mönnuð.

„Það er farið að bera á því að það sé ekki nægileg mönnun. Það stefnir í ástand sem ekki verður haldbært,“ segir María. „Þetta er ákvörðun sem ég hef íhugað mjög lengi og rætt við fjölskyldu mína. Ég tel að hún sé mjög brýn.“

María hefur starfað í Svíþjóð og segist þannig hafa að öðru að hverfa. Hún segist geta hugsað sér að koma aftur til starfa á spítalanum ef samið verður um „ásættanleg“ kjör.

„Það þyrfti að vera þannig breyting að maður gæti sætt sig við það,“ segir María. „Þetta er meðal annars til að vekja ráðamenn til umhugsunar og til þess að greina frá alvarleika málsins. Það er brýn þörf á að bæta kjörin og semja.“