Vinsælastur allra á Íslandi og í Ameríku

Páfagauksmyndin Rio, þar sem Jesse Eisenberg og Anne Hathaway tala fyrir aðalpersónurnar, er vinsælasta kvikmyndin á Íslandi um þessar mundir samkvæmt upplýsingum frá Smáís. Þetta er hliðstætt því sem er að gerast í hinni stóru Ameríku en þar situr páfagaukurinn einnig í efsta sæti. Myndin er frá sömu framleiðendum og gerðu hinar vinsælu Ísaldarkvikmyndir og því er ekkert skrýtið að smáfólkið skuli flykkjast í bíó með foreldrum og forráðamönnum.

Fjölskyldumyndin Hopp hefur einnig notið töluverðra vinsælda og hefur komið sér vel fyrir í öðru sæti. Fast á hæla hennar kemur Arthur með ólíkindatólinu Russell Brand og Óskarsverðlaunaleikkonunni Helen Mirren í stærstu hlutverkunum en í fjórða sæti er hasarmyndin Hanna með Cate Blanchett og Eric Bana. Fimmta vinsælasta kvikmynd vikunnar er síðan hryllingsmyndin Scream 4 úr smiðju Wes Craven.

Íslenska kvikmyndin Okkar eigin Osló getur vel við unað því alls hafa 23 þúsund séð myndina. Heldur minni aðsókn er á Kurteist fólk, en tæplega sex þúsund hafa borgað sig inn á hana.