Misheppnuð Gaga

Hin vinsæla söngkona, Lady Gaga, tók nýverið aftur saman við gamlan kærasta sinn, bareigandann Luc Carl. Eftir aðeins nokkurra vikna samband frétti söngkonan af því að unnustinn átti einnig í sambandi við aðra stúlku.

„Þau eru nýbyrjuð saman en hún er hrædd um að missa Carl aftur því hún getur ekki treyst honum. Hún er líka miður sín yfir því að vera „hin konan“,“ var haft eftir ónefndum vini söngkonunnar. Parið átti í sambandi áður en Lady Gaga skaust upp á stjörnuhimininn og áttu að hafa hætt saman vegna fíkniefnavanda hennar, þótt aðrar heimildir segi að Carl hafi haldið framhjá söngkonunni og hún því bundið enda á sambandið.

„Gaga hefur náð heimsfrægð en hvað einkalífið varðar finnst henni hún misheppnuð því hún fær ekki manninn sem hún elskar til að elska hana á móti.“ Samkvæmt fyrrnefndum vini söngkonunnar á hún að hafa verið full grunsemda og ákveðið að hringja í fyrrum kærustu sem sagðist enn eiga í sambandi við manninn. „Gaga varð miður sín. Hún óttast að hann sé aðeins með henni vegna frægðar hennar og fjár.“