Ronaldinho sá besti í heimi 2004

Brasilíski snillingurinn Ronaldinho var í gær útnefndur besti knattspyrnumaður heims hjá FIFA fyrir árið 2004 en hann var efstur í kjöri landsliðsþjálfara og fyrirliða landsliða heims.Samskonar verðlaun voru einnig afhent hjá konunum og þar var þýska knattspyrnukonan Birgit Prinz valin best annað árið í röð. Alls kusu 157 landsliðsþjálfarar og 145 fyrirliðar að þessu sinni en Ronaldinho fékk 68 fleiri atkvæði en Frakkinn Thierry Henry sem þarf að sætta sig við annað sætið í kjörinu annað árið í röð. Ronaldinho fékk 620 atkvæði, Henry var með 552 en í þriðja sæti var síðan Úkraínumaðurinn Andriy Shevchenko sem var í síðustu viku valinn besti Knattspyrnumaður Evrópu af franska tímaritinu France Football en bæði Ronaldinho og Henry voru gjaldgengir í því vali. Andriy Shevchenko fékk mun færri atrkvæði en þeir félagar eða alls 253. Nú hafa fjórir Brasilíumenn verið kosnir bestu knattspyrnumenn heims í 14 ára sögu útnefningarinnar og allir byrja þeir á R og ganga aðeins undir einu nafni þau auk Ronaldinho í gær þá hafa Ronaldo (1996, 1997 og 2002), Rivaldo (1999) og Romario (1994) fengið þessi virtu verðlaun. Ronaldino, sem er 24 ára, sló í gegn með Barcelona en hann gekk til liðs við liðið í upphafi ársins og valdi frekar að fara þangað en til Manchester United í ensku úrvalsdeildinni. "Ég vil fyrst og fremst þakka félögum mínum hjá Barcelona því ég hefði aldrei getað náð þessu takmarki án þeirra," sagði Ronaldinho sem var settur í fyrsta sæti hjá 89 af landsliðsþjálfurnum og fyrirliðunum en Henry var 79 sinnum í efsta sæti. Þetta var ennfremur í fyrsta sinn síðan 2000 að besti leikmaður heims leikur ekki með spænska stórliðinu Real Madrid. Zinedine Zidane hlaut þessi verðlaun í fyrra en hann var að þessu sinni í fjórða sæti en fimmti var síðan Pavel Nedved miðjumaður Juventus og fyrirliði tékkneska landsliðsins. Þýska knattspyrnukonan Birgit Prinz valin best annað árið í röð en bandaríska knattspyrnukonan Mia Hamm, sem hlaut verðlaunin í tvö fyrstu skiptin sem þau voru afhent, varð í öðru sæti og þriðja varð síðan sú brasilíska Marta.