Fljúga frá Ástralíu til að sjá Frostrósir

„Við verðum í Noregi um jólin og áramótin en þegar við fréttum af þessum tónleikum fannst okkur lítið tiltökumál að bæta Íslandi á listann,“ segir Ástralinn Craig Murray. Hann hyggst fljúga alla leið til Íslands og vera viðstaddur jólatónleika Frostrósa sem haldnir verða á Akureyri um miðjan næsta mánuð. Murray er að eigin sögn forfallinn Eurovision-aðdáandi og hefur verið allar götur síðan Abba-flokkurinn kom, sá og sigraði árið 1974. Hann ætti því að fá nóg fyrir sinn pening enda troða upp á tónleikunum þrír söngvarar sem eru með slíka reynslu á bakinu: þau Friðrik Ómar, Regína Ósk og Hera Björk.

Craig upplýsir að hann hafi notið liðsinnis Heru Bjarkar við að panta sér hótel og miða á tónleikana en hann, ásamt félaga sínum Darryl, ætla einnig að skoða Reykjavík og fara ferðamannaleiðina Þingvellir-Gullfoss-Geysir. Hann viðurkennir að þetta hljómi ekkert sérstaklega rökrétt, að fara frá Ástralíu til Íslands og hlýða þar á jólatónlist, en: „Það kom okkur bara svo stórkostlega á óvart hvað allt er ódýrt á Íslandi, flugið til Akureyrar kostaði nánast ekki neitt.“ Eitthvað sem kemur ekki til af góðu.

Craig verður hins vegar ekki sleppt án þess að hann sé spurður út í frammistöðu Heru Bjarkar í Osló sem vakti mikla athygli en fékk ekki mörg stig. „Ég var mjög vonsvikinn með niðurstöðuna, ég hélt í alvöru að hún væri að fara að vinna þessa keppni og trúði því.“ - fgg