Geta misst allt að 2 mánuði úr

Hjartveik börn geta misst allt að tveimur mánuðum á ári úr skóla án þess að þeim sé bætt það upp. Margrét Ragnars, formaður Neistans, segir að það fari eftir skólum hvort börnin fái aukakennslu eða ekki. Langveik börn sem eru frá námi í tvo mánuði samfleytt eða lengur fá kennslu í staðinn. Hjartveiku börnin hafa sérstöðu miðað við önnur langveik börn því að þau eru ekki endilega samfleytt frá námi. Þau eru kannski á spítala vegna hjartaaðgerðar í tvær eða þrjár vikur og liggja svo heima í nokkra daga eða vikur. Þegar þau eru byrjuð aftur í skólanum er alltaf sýkingarhætta fyrir hendi auk þess sem þau eru veikari fyrir en önnur börn og geta því verið mikið frá skóla vegna veikinda. Samkvæmt grunnskólalögum eiga langveik börn að fá kennslumissi bættan en það virðist hafa verið túlkað þannig að það gildi bara um börn sem eru tvo mánuði samfleytt frá námi. Það fer því fyrst og fremst eftir skólum, skólastjórum og umsjónarkennurum hvort hjartveikum börnum er bættur upp námsmissirinn eða ekki. Aðspurð hversu mikil áhrif það hefur á barn að missa tvo mánuði úr skóla, segir Margrét Ragnars, formaður Neistans, að áhrifn séu veruleg. Allur missir úr skóla hafi einhver áhrif og tveir mánuðir á ári geti haft mjög varanleg áhrif ef kennslan sé ekki bætt upp. Margrét segist vilja sjá þær úrbætur að meðvitund sé um það í skólakerfinu að fyglst sé með hjartveikum börnum ef þau fari að dragast aftur úr og að þeim verið mætt á sem bestan hátt. Eins sé mikilvægt að ferli sé innan skólanna þar sem allir kennarar viti að það sé hjartveikt barn í skólanum og það geti komið eitthvað upp á hjá því og það sé þá brugðist rétt við því.