Enn óvíst með oddvita sjálfstæðismanna

„Það eru engar nýjar fréttir varðandi forystumál Sjálfstæðisflokksins," sagði Hanna Birna Kristjánsdóttir borgarfulltrúi, þegar Vísir náði tali af henni síðdegis í dag.

Geir H. Haarde sagðist í Silfri Egils síðastliðinn sunnudag vonast til þess að Vilhjálmur kynnti í þessari viku ákvörðun sína um það hvort hann hygðist starfa áfram sem oddviti borgarstjórnarflokksins og taka sæti sem borgarstjóri að ári. Geir sagði að óvissa um málið væri óþægileg.

Nú eru fimm dagar liðnir af vikunni og Vilhjálmur hefur enn ekki tilkynnt um ákvörðun sína. Ekki hefur náðst í Vilhjálm í dag en hann tjáði Vísi á þriðjudag að hann hygðist taka sér þann tíma sem hann þyrfti. Ekki hefur heldur náðst í Ólaf Friðrik Magnússon borgarstjóra.