RÚV á 17 vinsælustu dagskrárliði síðustu viku

RÚV á 17 vinsælustu dagskrárliði síðustu viku samkvæmt könnun Capacent sem birt var rétt áðan. Laugardagslögin eru, líkt og í síðustu viku, vinsælasti dagskrárliðurinn með 57% uppsafnað áhorf.

Í síðustu viku átti RÚV tólf vinsælustu þættina en þá tókst bílaþættinum Top Gear á Skjá einum að lauma sér í þrettánda sætið þökk sé íslensku ívafi þess þáttar.

Þrír dagskrárliðir, Laugardagslögin, Gettu betur og Spaugstofan, eru allir með yfir 50% uppsafnað áhorf. Það sama var uppi á teningnum í síðustu viku.

American Idol, sem sýndur er í læstri dagskrá á Stöð 2, er vinsælasti þátturinn utan RÚV en hann er með 25,4% uppsafnað áhorf.

Athygli vekur að fréttir RÚV hækka um 6% frá síðustu viku, fara úr 37,5% í 43,5% uppsafnað áhorf. Fréttir Stöðvar 2 gefa hins vegar aðeins eftir og eru ekki lengur inni á listanum yfir 20 vinsælustu dagskrárliðina. Fréttirnar eru nú með 23,2% uppsafnað áhorf, rúmu einu prósenti minna en Ísland í dag.