Gríðarleg uppsveifla hjá QPR

Enska b-deildarfélagið QPR er heldur betur í sókn þessa dagana. Nýir eigendur félagsins ætla sér að koma þessum fornfræga klúbbi í efstu deild fyrir árið 2010.

Eigendur QPR eru þeir Flavio Briatore, Bernie Ecclestone og Lakshimi Mittal, en þeir Briatore og Ecclestone eru þekktari fyrir afskipti sín af Formúlu 1 en knattspyrnu. Þremenningarnir eru hinsvegar mjög efnaðir og hafa undanfarið verið duglegir við að afla styrktaraðila fyrir félagið.

Í gær gerði félagið 7 milljón punda samning við fyrirtækið Gulf Air í Barein og mun nafn þess prýða búninga Rangers á næstu leiktíð í b-deildinni. QPR fær eina milljón punda fyrir fyrsta árið, en ríkulegan bónus ef liðinu tekst að komast upp um deild á árunum tveimur þar á eftir.

Þetta er langstærsti samningur þessarar tegundar sem gerður hefur verið í ensku b-deildinni og til gamans má geta að fyrir fimm árum hljóðaði sambærilegur styrktarsamningur QPR við fyrirtækið JD Sports upp á 37,000 pund.

Þegar er búið að verja umtalsverðum fjárhæðum í endurbætur á Loftus Road, heimavelli liðsins síðan árið 1917. Fyrir fjórum mánuðum gerði QPR samning við ítalska íþróttavöruframleiðandann Lotto fyrir 20 milljónir punda.

Það er því ljóst að mikill metnaður er í herbúðum félagsins og mikið má vera ef það vinnur sér ekki sæti í efstu deild á ný. Liðið var síðast í efstu deild leiktíðina 1995-96, en hefur mátt muna fífil sinn fegurri síðan.