Salsa, hipp hopp og eróbikk

Heimsmeistarinn í hipp hopp dansi og yfirmaður Fitness First-keðjunnar í Bretlandi eru á leiðinni til landsins ásamt fríðu föruneyti til að taka þátt í líkamsræktarráðstefnunni Fitness 2004. "Ráðstefnan er haldin að erlendri fyrirmynd og er hugsuð fyrir almenning," segir skipuleggjandinn Unnur Pálmarsdóttir en Fitness 2004 er haldið í Sporthúsinu á föstudag og laugardag. "Það koma sex erlendir kennarar til landsins en það verður opnunartími með þeim öllum klukkan fimm á föstudaginn. Þar ætlar dj. Páll Óskar að þeyta skífum, glaðningar verða í boði og kennararnir sýna brot af því sem hægt verður að sækja á ráðstefnunni." Á Fitness 2004 er hægt að fá ferskar hugmyndir fyrir haustið. "Þetta verður húllum hæ og fjör," segir Unnur. "Hægt verður að fara í pallaþolfimi, salsa, fönkdans, diskó, eróbikk og kynnast ýmsum nýjungum í hreyfingu," en einnig verður hægt að sækja fyrirlestra í Sporthúsinu um sjúkra- og einkaþjálfun. "Þetta er okkar framtak að mæta kröfum áhugamanna um líkamsrækt og bætta heilsu." Unnur Pálmarsdóttir hóf þolfimiferil sinn með Magnúsi Scheving. "Meistari Magnús er guðfaðir minn í þessu öllu saman. Hann ýtti mér út í þetta og við flökkuðum saman um heiminn í þrjú ár til að kenna á ráðstefnum. Svo fór Magnús í Latabæ sem kunnugt er en ég hélt áfram í þolfiminni." Unnur hefur kennt á líkamsræktarráðstefnum um allan heim síðastliðin sjö ár og var nýlega kosin þolfimikennari ársins í Bretlandi. "Ég hef kynnst mörgum góðum kennurum á flakkinu um heiminn og því tilvalið að sameina þá hér á landi til að kynna nýjungar fyrir Íslendingum," segir Unnur sem vonast til þess að Fitness-ráðstefnan verði haldin einu sinni á ári hér eftir. Áhugasamir um skemmtilega hreyfingu geta keypt staka tíma á Fitness 2004 eða borgað sig inn á ráðstefnuna í heild en góður hópafsláttur er einnig í boði.