Carlo Ponti látinn

Ítalski kvikmyndaframleiðandinn Carlo Ponti, eiginmaður leikkonunnar Sophiu Loren, er látinn, 94 ára gamall. Ponti framleiddi margar sígildar myndiar, þar á meðal La Strada eftir Fellini, Dr. Zhivago og Blowup.

Ponti kvæntist Loren árið 1957 þegar hún var aðeins 22 ára. Giftingin var síðar dæmd ógild en árið 1966 giftust þau aftur.

Ponti uppgötvaði Loren þegar hún tók þátt í fegurðarsamkeppni þegar hún var aðeins fimmtán ára. Ponti var þá dómari keppninnar, 37 ára gamall. Hann ruddi leið Loren til frægðar og hvatti hana til að læra ensku.

Hann breytti nafni hennar úr Sophia Lazzaro og tryggði henni hlutverk í nokkrum ódýrum ítölskum myndum.

Árið 1962 fékk Loren Óskarinn fyrir hlutverk sitt í Two Women sem var framleidd af Ponti. Fjórum árum síðar var Ponti sjálfur tilnefndur fyrir Dr. Zhivago.