Ósátt við starfsmatið

Félagar í Starfsmannafélagi Kópavogs felldu kjarasamning við bæinn með 55 prósentum atkvæða í kosningu þar sem 160 af 766 félagsmönnum greiddu atkvæði. "Þetta er sami samningur og önnur félög hafa verið að samþykkja," segir Jófríður Hanna Sigfúsdóttir, formaður félagsins. "Það virðist vera sem félagar Starfsmannafélags Kópavogs miði sig við Reykjavík," segir Jófríður og telur að óánægja með starfsmat hafi orðið til þess að samningurinn var felldur. Starfsmatið færir bæjarstarfsmönnum í Kópavogi lakari kjör en borgarstarfsmönnum í Reykjavík. Jófríður ræddi við formann launanefndar sveitarfélaga í gær og segir líklegt að vegna fría gerist ekkert fyrr en eftir verslunarmannahelgi.