Ellefu hringtorg í Vallarhverfi

Sennilega geta fá hverfi á landinu státað af jafn mörgum hringtorgum og Vallahverfið í Hafnarfirði en í og við hverfið eru ein ellefu hringtorg. Dýrleif Ólafsdóttir sem býr á Blómvöllum segist þurfa að fara um sex hringtorg þegar hún aki börnum sínum á æfingavöllinn sem þó er stutt frá. "Maðurinn minn hafði orð á því að hann hefði orðið ringlaður um daginn þegar hann þurfti að fara þessa leið sex sinnum sama dag en það eru 36 hringtorgsferðir," segir Dýrleif. Helga Stefánsdóttir, vekfræðingur á umhverfis- og tæknisviði Hafnarfjarðarbæjar, segir hringtorgin góða lausn út frá umferðaröryggi og eins þyki flestum þau betri en bið við umferðarljós. Hún segir að nú þegar hverfið er í uppbyggingu geti þetta litið skringilega út en verði það varla þegar hverfið verður fullbyggt. Hún segir að á næsta ári verði Krísuvíkurbraut framlengd að Reykjanesbraut, ef allt gengur eftir, og þá geta íbúar Vallahverfis sparað sér ófáar hringtorgsbunur á leið sinni út úr hverfinu.