Skrifar barnabók um Gísla á Uppsölum

„Ég er á kafi í heimildarvinnu núna en ætla að reyna að koma henni út fyrir næstu jól," segir Ingibjörg Reynisdóttir, leikkona og rithöfundur. Hún er að skrifa barna- og unglingabók um einbúann Gísla Gíslason á Uppsölum. Ingibjörg segist alltaf hafa verið heilluð af Gísla og einföldu lífsmunstri hans og hún telur að nú sé einmitt rétti tíminn til að enduruppgötva lífspeki Gísla á tímum þegar allir vilja eiga og gera allt en gráta um leið horfinn heim efnishyggjunnar.

Ingibjörg segist í fyrstu hafa viljað gera fremur einfalda og litla bók um Gísla með fallegum teikningum. En nú, þegar hún hafi kynnst þessari persónu betur í gegnum margvíslegar heimildir, sé það ómögulegt. „Ég er búin að viða að mér svo miklum upplýsingum og það verður erfitt að fórna miklu. En mig langar að hafa þetta einfalt og fallegt," útskýrir Ingibjörg.

Rithöfundurinn segir að Gísli hafi komið henni á óvart. „Þetta er maður sem var mikið lagður í einelti í æsku. Hann átt sína góðu daga en líka sína slæmu. Gísli var nátengdur náttúrunni og það er ýmislegt annað sem neysluhyggjukynslóðin gæti lært af honum," útskýrir Ingibjörg sem sjálf hefur ákaflega breytt viðhorf til þessa þekktasta einbúa Íslands. „Ég leit á hann sem einhvern karlfausk en þær hugrenningar sem ég hef lesið eftir hann hafa leitt í ljós að hann var mjög hugsandi maður sem spáði mikið og spekúleraði," segir Ingibjörg sem útilokar ekki að ráðast í gerð kvikmyndar um Gísla þegar bókin hefur komið út.

- fgg