Madonna vinsælust hjá Bretum

Lög bandarísku söngkonunnar Madonnu voru þau mest spiluðu í Bretlandi síðastliðinn áratug.

Tekin var saman spilun á öllum lögum í útvarpi, sjónvarpi eða á opinberum stöðum og varð þetta niðurstaðan. Í öðru sæti voru Bítlarnir, þótt þrjátíu ár séu liðin síðan þeir hættu störfum. Í næstu sætum á eftir voru Robbie Williams, Queen og Take That; allt breskir listamenn eins og Bítlarnir. Athygli vekur að Robbie lenti ofar á listanum en fyrrverandi hljómsveit hans, Take That.

Það var fyrirtækið PPL, sem rukkar höfundargjöld fyrir hönd listamanna, sem stóð fyrir rannsókninni sem náði yfir árin 2000 til 2009. Aðeins ein hljómsveit sem var stofnuð á áratugnum komst á topp tíu-listann, eða Sugababes.

Í desember síðastliðinum greindi PPL frá því að mest spilaða lag síðasta áratugar í Bretlandi var Chasing Cars með Snow Patrol.