Ásdís Rán hlær að lygasögum búlgarska fjölmiðla

„Þeir eru alltaf að búa til einhverjar sögur um mig vegna þess að ég er vinsæl hérna. Þeir spyrja mig ekki einu sinni,“ segir fyrirsætan og athafnakonan Ásdís Rán Gunnarsdóttir og hlær.

Búlgarski fréttamiðillinn Blitz.bg fullyrti í gær að rannsókn væri í gangi hjá óþekktu dagblaði um meint framhjáhald Ásdísar Ránar. Þar kom fram að Ásdís, sem er gift fótboltamanninum Garðari Gunnlaugssyni, ætti ástmenn á Íslandi og í Búlgaríu. Þegar líða tók á daginn höfðu fleiri vefmiðlar tekið fréttina upp, en Ásdís lætur sér fátt um finnast og segir að fólk í Búlgaríu ekki taka slíkar fréttir ekki alvarlega.

„Allt sem þeir skrifa snertir okkur ekki og er búið til,“ segir hún. „Þessar fréttir eru ekki teknar alvarlega í Búlgaríu. Það vita allir að þetta er bara eitthvað rugl, þessar sögur koma um alla sem eru frægir hérna. Um daginn var saga um að einn í fótboltaliðinu hans Garðars væri svo ástfanginn af mér að hann skildi við konuna sína útaf mér. Ég hef aldrei hitt hann! Ég veit ekki hvort þetta var satt eða ekki, en þetta var í öllum blöðum.“

Spurð hvort hún hafi látið athuga réttarstöðu sína gagnvart fjölmiðlunum ytra, segist Ásdís ekki hafa gert það, enda séu flestar sögurnar fyndnar.

„Það er ekkert á bakvið þessar sögur, þeir nefna aldrei nöfn, hvað gerðist eða hvenær,“ segir hún. „En sögurnar eru yfirleitt ekki slæmar, bara fyndnar.“

Fréttablaðið hafði samband við blaðamann vefsíðunnar Blitz.bg. Hann vildi ekki gefa upp hvaðan sagan væri sprottin og benti á að dagblað væri að rannsaka málið. Aðspurður hvort dagblaðið væri Búlgarskt sagðist hann ekki vita það, en taldi þó að það væri annað hvort enskt eða íslenskt.

Og það er nóg að gerast hjá Ásdísi og fjölskyldu, en fjölmiðlar greindu frá því í gær að Garðar Gunnlaugsson, eiginmaður Ásdísar, hafi skrifað undir hjá austurríska úrvalsdeildarliðinu LASK Linz. Samningur Garðars gildir út tímabilið, sem endar í maí, en Ásdís segist ekki ætla að flytja til Austurríkis. „Ég verð örugglega með annan fótinn þar,“ segir hún. „Ég er með fullt í gangi hérna. Þetta er svo stuttur samningur og það þýðir ekkert fyrir mig að fara að veseneast með krakkana til Austurríkis.“

atlifannar@frettabladid.is.