Samfylkingin í Kópavogi svarar Gusturum

Samfylkingin í Kópavog hefur sent frá sér eftirfarandi tilkynningu vegna athugasemdar Hestamannafélagsins Gusts sem birtist í fjölmiðlum í morgun. Vegna samþykktar sem gerð var á félagsfundi Hestamannafélagsins Gusts 11. maí síðastliðinn er nauðsynlegt að ítreka eftirfarandi.

 1. Fulltrúar Samfylkingarinnar hafa hvergi haldið því fram að það ætti ,, að semja eingöngu um flutning þeirra sem nú eiga hesthús í Gusti" eins og fram kemur í frásögn af félagsfundinum á heimasíðu Gusts.  Samfylkingin hefur þvert á móti lagt á það mikla áherslu í sínum málflutningi að félagið flytti í heild sinni og að á Kjóavöllum eru fjölmörg tækifæri til að styrkja og stækka félagið.

2. Aftur á móti mótmæltum við því mjög harðlega  að verðlauna ,,uppkaupsmennina" sem gerðu aðför að félaginu sl. haust með miklu hærra verði en félagsmenn eða hestamannafélagið fá fyrir sínar eignir.

3. Við höfum bent á að við teljum verð fyrir hvern fermetra í hesthúsunum óeðlilega hátt eða um þrefalt markaðsverð.  Engin rök hafa komið fram sem réttlæta slíkt verð.  Með þessu er bærinn að borga hæsta verð fyrir land sem hann hefur nokkurn tíma borgað.

4. Við vísum öllum ásökunum á bug um að við höfum veist að einstaklingum í Gusti en bendum á að það hefði verið skynsamlegra og farsælla fyrir félagið að hafa bæjarfulltrúa allra flokka með í ráðum við undirbúning á flutningi hestamannafélagsins og hefja það þannig yfir pólitískar deilur.  Komið hefur fram að bæjarfulltrúar meirihlutans hafa verið með í ráðum allan tíma.

5. Hins vegar eru vonandi allir sammála um þær hugmyndir sem fram koma í niðurlagi ályktunarinnar um að markmið ,,bæði félagsins og bæjaryfirvalda er að byggja upp svæði fyrir Gustara sem verði sveitarfélaginu til sóma og hestamennsku í Kópavogi til framdráttar"

6. Samfylkingin í Kópavogi hefur stutt Hestamannafélagið Gust dyggilega frá því að uppkaupsmenn veittust að félaginu með ofurtilboðum sínum í hesthús.  T.d. hefur Samfylkingin lagt áherslu á það í bæjarstjórn að samráð skyldi hafa við félagið v/skipulagsbreytinga sem þrengdu að reiðleiðum að Glaðheimum og við höfum sett þann fyrirvara við samþykki á þessum breytingum, að þær væru þóknanlegar hestamönnum í Gusti.