Fótbolti

Dómsdagur fyrir evrópska fótboltann: UEFA fundar með öllum í dag

Ingvi Þór Sæmundsson skrifar
Hvenær fer EM alls staðar fram?
Hvenær fer EM alls staðar fram? vísir/getty

Dagurinn í dag, 17. mars, er afar mikilvægur fyrir fótboltann í Evrópu. Þá verður nefnilega fundað um hvað gera skuli við Evrópumót karla sem á að fara fram í sumar og Meistara- og Evrópudeildina sem hafa verið settar á ís vegna kórónuveirunnar.

Á tímum kórónuveirunnar þykir ekki skynsamlegt að margir komi saman undir sama þaki og því verður notast við fjarfundarbúnað. Á fundinum, sem hefst klukkan 13:00 að íslenskum tíma, verða fulltrúar allra 55 aðildarríkja UEFA, þ.á.m. Íslands, og aðrir hagsmunaaðilar.

EM alls staðar átti að fara fram 12. júní til 12. júlí en nánast engar líkur eru á að svo verði. Rætt hefur verið um að færa EM til loka þessa árs eða fram á næsta sumar. Í viðtali í Sportinu í dag á Stöð 2 Sport sagði Guðni Bergsson, formaður KSÍ, að sér hugnaðist seinni kosturinn betur.

„Ég er hrifnari af því að fara með þetta fram á næsta sumar, upp á undirbúninginn, tíðarfarið og stemmninguna í kringum keppnina,“ sagði Guðni.

Einn hængur er þó á því færa EM fram á næsta sumar því þá fer EM kvenna fram í Englandi. Undanúrslitaleikirnir og úrslitaleikurinn á EM karla áttu að fara fram á Wembley og það kallar því á tilfæringar.

Klippa: Guðni um EM

Á fundi UEFA verður einnig ákveðið hvenær eða hvort umspilið fyrir EM fari fram. Ísland átti að mæta Rúmeníu á Laugardalsvelli 26. mars. Fimm dögum síðar átti sigurvegarinn að mæta annað hvort Búlgaríu eða Ungverjalandi.

Rætt hefur verið um að nýta tímann þegar EM átti að fara fram til að ljúka leikjum í umspili, klára Meistara- og Evrópudeildina og vetrardeildirnar í Evrópu. Þá hefur sú hugmynd að sleppa umspilinu og hafa 20 lið á EM í stað 24 einnig verið nefnd. Það hugnast Íslendingum alls ekki.

Keppni var í Meistara- og Evrópudeildinni var hætt í 16-liða úrslitum. Á fundinum verður rætt hvernig, eða hvort, eigi að klára þessar keppnir. Meðal hugmynda sem fram hafa komið er að aðeins einn leikur verði í 8-liða úrslitum keppnanna og undanúrslitaleikirnir og úrslitaleikurinn myndu fara fram í sömu borg. Það yrði þá eins konar úrslitahelgi eins og þekkt er í handbolta.

Spurningarnar eru margar og vonandi fást svör við þeim eftir fundinn í dag.


Tengdar fréttir

UEFA krefst hárra bóta vegna frestunar EM

UEFA mun krefjast 275 milljóna punda, jafnvirði um 46 milljarða króna, frá aðildarfélögum sínum og deildum til að bregðast við tapinu af því að fresta EM karla í fótbolta um eitt ár.

Rúmenar fara fram á frestun

Fátt bendir til þess að Ísland og Rúmenía mætist á Laugardalsvelli 26. mars, í umspili um sæti á EM karla í fótbolta. Rúmenska knattspyrnusambandið mun á morgun formlega óska eftir því að umspilinu verði frestað.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.