Lífið samstarf

Þetta er „í fylgd með fullorðnum bók“

Bjartur/Veröld
„Ég er búinn að vinna úr mínum málum. Ég er á góðum stað í dag og hef verið það í einhvern tíma. Ég geng alveg sáttur frá borði.“ Árni Páll Árnason segir frá skrykkjóttu lífi sínu í bókinni Herra Hnetusmjör - hingað til
„Ég er búinn að vinna úr mínum málum. Ég er á góðum stað í dag og hef verið það í einhvern tíma. Ég geng alveg sáttur frá borði.“ Árni Páll Árnason segir frá skrykkjóttu lífi sínu í bókinni Herra Hnetusmjör - hingað til

Bók vikunnar á Vísi er Herra Hnetusmjör - hingað til.

Herra Hnetusmjör – Árni Páll Árnason – hefur verið eins og hvirfilbylur í íslensku tónlistarlífi á undanförnum árum. Lögum hans er streymt í milljónum skipta á tónlistarveitum og framganga hans á tónleikum hefur vakið mikla athygli og aðdáun.

Nú er komin út ævisaga þessa 24 ára gamla tónlistarmanns, Herra Hnetusmjör - hingað til. Í bókinni fer Sóli Hólm yfir skrykkjótta lífsgöngu Árna Páls sem spannar allt frá hamingjuríkri æsku í Hveragerði til freistinga dópsins og skuggahliða Reykjavíkur. Sagan segir frá hvernig Árni Páll komst á toppinn í íslensku rappsenunni meðan hann féll til botns í neyslu og óreglu.

Tannlaus og með stæla í Hveragerði þar sem Árni Páll Árnason – Herra Hnetusmjör – átti sæluríka daga. Á leikskólanum Óslandi má segja að hann hafi tekið sitt fyrsa gigg, söng Ryksugan á fullu með Róberti Smára félaga sínum.

En sagan endar vel. Í dag hefur Árni Páll snúið baki við skuggahliðum óreglunnar og hafið nýtt líf með kærustu sinni Söru Linneth L. Castañeda og 9 mánaða syni þeirra. Hann segir allt látið flakka í bókinni þó hún hafi byrjað sem brandari.

„Þetta er svona Justin Bieber moove, byrjaði sem grín en svo náði galsinn tökum á okkur og allt í einu vorum við komnir með bók. Þetta er ævisaga en ég er 24 ára og það stuðar einhverja, sem er bara gaman,“ segir Árni Páll. 

„Birnir ég og Joe eftir Giggið á Húrra á Airwaves 2016, daginn áður en ég spilaði fyrir kók.“ Árni Páll lýsir í bók sinni meðal annars baráttunni við dópið og hvernig hann náði sér aftur á beinu brautina.

„Það er farið í allt þarna. Bókin byrjar eins dagbók Berts en fer svo smám saman út í Svartur á leik. Þetta er alveg „Í fylgd eð fullorðnum“ bók sko, hún er ekki fyrir börn en fyrir unglinga og upp úr. En þetta er bara raunveruleikinn og þarna er ekkert sem áttrætt fólk hefur ekki séð,“ segir hann, spurður hvort bókin sé við hæfi í jólapakkann til ömmu og afa. „Ég var reyndar mjög kvíðinn að tala við mömmu um bókina. Svo spurði Sóli hvort ég væri búinn að tal við ömmu! Ha, nei! Pabbi verður bara að tala við hana,“ segir hann hlæjandi.

Verða jólaboðin þá ekkert vandræðaleg þegar fjölskyldan verður öll búin að lesa sögurnar? „Þau þekkja söguna mína en, ég var reyndar ekki búinn að pæla í því , ég verð kannski að hringja mig inn veikan,“ segir hann. „Ég samt alveg sjúklega ánægður með þetta. Fyrst átti þetta að vera eitthvert „money grab og fara bara í ódýrustu leiðina til að fá sem mestan pening en svo áttuðum við okkur á að þetta var ekki verkefni til að fá peninga fyrir, heldur til að skilja eitthvað epískt eftir. Við fórum því af fullum krafti í þetta með Bjarti Veröld,“ segir Árni Páll. Það hefi ekki verið auðvelt að skrifa bókina.

Með skammbyssu í skúrnum hjá Birgi Hákoni vini sínum. „Ef Biggi hefði verið fótboltamaður má líkja væntingum undirheimanna til Bigga sem dópsala við það þegar Eiður Smári var að stíga sín fyrstu skref í fullorðinsfótbolta.“

„Það var klárlega erfitt að vinna þetta. Sóli tók viðtöl við mömmu og við systur mína og það var farið yfir gömul myndaalbúm. Það tekur á að skoða árið 2016, sem var síðasta árið mitt í rokkinu. Ég á ennþá gamla símann minn sem ég notaði þá, mölbrotinn ofan í skúffu og fór í gegnum hann til að finna myndir í bókina. Það var drulluerfitt að lesa gömul sms og þar inni eru grófar myndir. Margar þeirra fóru í bókina. Mér fannst mikilvægt að setja visual á sögurnar,“ segir hann.

„Ég er búinn að vinna úr mínum málum. Ég er á góðum stað í dag og hef verið það í einhvern tíma. Ég geng alveg sáttur frá borði,“ segir hann. Það sé ekki á döfinni að gefa út aðra æfisögu.

„Klárlega ekki. Ég vona að lífið verði ekki eins spennuhlaðið fyrir aðra bók. Nú erum við bara að spá í hluti eins og stækka við okkur og nám og svona hversdagslegri hluti. Ég vona að restin af lífi mínu verði þannig að enginn nenni að lesa um það.“




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.