Liðsfélagi Gylfa hótar blaðamanni lögsókn

Þetta var ekki góður landsleikjagluggi fyrir Gylfa okkar Sigurðsson en hann var miklu verri fyrir liðsfélaga hans James Rodriguez.

James Rodriguez kom til Everton í sumar og hefur staðið sig vel með liðinu. Hann er líka í stjörnuhlutverki hjá kólumbíska landsliðinu eins og Gylfi Þór Sigurðsson er hjá því íslenska.

James Rodriguez og félagar í kólumbíska landsliðinu töpuðu báðum leikjum sínum í undankeppni HM þar af fengu þeir 6-1 skell á móti Ekvador í seinni leiknum. Fyrri leiknum tapaði Kólumbía 3-0 á móti Úrúgvæ.

Tapið á móti Úrúgvæ var stærsta tap Kólumbíu á móti Úrúgvæ í 82 ár en skellurinn á móti Ekvardor var samt stóra áfallið.

Javier Hernandez Bonnet, fjölmiðlamaður hjá Blu Radio, sagði spænska blaðinu Marca frá því að James Rodriguez hafi í framhaldinu af þessum vandræðalegu tapleikjum lent í slagsmálum við liðsfélaga sinn.

James Rodriguez og Jefferson Lerma, sem spilar með Bournemouth, áttu að hafa lent í slagsmálum á æfingu kólumbíska landsliðsins.

James Rodriguez hefur nú hótað blaðamanninum lögsókn. „Þeir sem búa til þessar fölsku fréttir eru bara að reyna að ljúga upp á mig,“ skrifaði James Rodriguez í yfirlýsingu.

„Mín skilaboð til almennings, til fjölmiðla og til okkar stuðningsmanna eru að ég hafna öllum þessum fréttum um ofbeldi, árásir eða deilur sem áttu að hafa orðið á milli okkar leikmanna þar sem ég átti að vera upphafsmaðurinn,“ skrifaði Rodriguez.

„Að lokum þá vil ég biðja ykkur um að halda ekki áfram að dreifa þessum fölsku fréttum. Þeir sem bjuggu til þessar fölsku ásakanir eru bara að reyna að dreifa lygasögum og ég mun lögsækja þá ef ég tel þörf á því,“ skrifaði James Rodriguez.

Hann segir blaðamanninn vera að sverta orðspor sitt og ætlar mögulega að fara í hart og með málið fyrir dómstóla.

Kólumbíska landsliðið hefur aðeins náð í fjögur stig út úr fjórum fyrstu leikjum sínum í undankeppninni. Liðið er því bara í sjöunda sæti af tíu liðum Suðurameríkuriðilsins.