Það er enginn skortur á sögum sem sagðar hafa verið um tíma Sir Alex Ferguson hjá Manchester United og snilligáfu þjálfarans. 

Skotinn hafði þann eiginleika að geta náð því besta út úr hverjum einasta leikmanni sínum. Leikmenn eins og Tom Cleverley, Darren Fletcher og Wes Brown sem allir léku hlutverk í sigurgöngu Ferguson hjá Man Utd hafa síðan fallið úr ensku úrvalsdeildinni með öðrum liðum eftir að Ferguson hætti. 

Þá má ekki gleyma Darron Gibson, nafn sem er ekki mjög kunnugt í fótboltaheiminum í dag en hann hefur leikið í neðri deildum Englands undanfarin ár. Hann var í akademíu Manchester United og spilaði með aðalliðinu undir stjórn Sir Alex í þrjú ár áður en hann fór til Everton.

Rio Ferdinand tekur sögu Gibson sem lýsandi dæmi um snilli Ferguson. Hann segir að þegar leikmenn hafi efast um liðsval stjórans hafi hann oftast haft rétt fyrir sér að lokum.

Margir bjuggust við því að United sem var 2-1 undir eftir fyrri leikinn gegn Bayern árið 2010 í Meistaradeildinni myndi byrja með aukaframherja til að herja á mark Bayern en í staðinn valdi Ferguson 23 ára gamlan Darron Gibson, mann sem hafði einungis byrjað tvo leiki fjóra mánuði á undan.

„Darron Gibson kom inn í byrjunarliðið á móti Bayern í Meistaradeildinni. Ekki illa meint fyrir Gibson, en við sátum allir þarna og hugsuðum „Við erum að spila við Bayern Munchen á heimavelli og þurfum að skora mörk, af hverju í ósköpunum valdi hann Gibson?“

Á innan við tveimur mínútum skorar Darron Gibson fyrsta markið. Ég horfði á bekkinn og hugsaði „þessi maður er snillingur“,“ sagði Rio Ferdinand.