Útlit er fyrir sunnanátt á bilinu fimm til þrettán metrum á sekúndu. Einnig fer víðfemt skilakerfi fer yfir landið frá vestri til austurs með tilheyrandi rigningu og súld.

Þetta kemur fram í hugleiðingum veðurfræðings á vef Veðurstofunnar. Þar segir að mest verði vætan sunnanlands, en þó að áttin sé suðlæg muni einnig rigna af og til á Norður- og Austurlandi sem sé gott fyrir gróðurinn á þeim slóðum.

„Á vestasta hluta landsins verða skilin farin yfir kringum hádegi og handan skilanna taka við smávegis skúrir. Seinnipartinn í dag og í kvöld dregur einnig úr vætunni í öðrum landshlutum.

Á morgun tekur við suðvestanátt, allvíða 5-10 m/s. Búast má við dálitlum skúrum í flestum landshlutum, líklega hangir hann þó þurr á Suðausturlandi og Austfjörðum.

Hiti 8 til 16 stig, hlýjast norðaustantil á landinu í dag, en suðaustanlands á morgun.

Á miðvikudag (þjóðhátíðardaginn) er síðan hæg suðlæg átt í kortunum, 3-8 m/s. Væntanlega verður þurrt um allt land. Norðanlands verður víða bjart veður, en meira af skýjum á himni á sunnanverðu landinu, þó eflaust sjáist til sólar á milli skýjanna. Þokuloft gæti sett strik í reikninginn og er þokan líklegust til að láta á sér kræla með austurströndinni,“ segir á síðunni.

Veðurhorfur á landinu næstu daga

Á þriðjudag: Suðvestlæg eða breytileg átt 3-10 m/s. Skýjað að mestu og víða dálitlir skúrir, einkum á vestanverðu landinu. Hiti víða 10 til 15 stig.

Á miðvikudag (lýðveldisdagurinn): Suðlæg átt 3-8 m/s. Skýjað með köflum sunnan- og vestanlands og hiti 10 til 14 stig, en léttskýjað á Norður- og Austurlandi með hita 13 til 18 stig.

Á fimmtudag: Suðaustan 5-10 á sunnanverðu landinu og skýjað, en úrkomulítið. Hægari vindur norðanlands og bjartviðri. Hiti 10 til 18 stig, hlýjast fyrir norðan.

Á föstudag: Hægt vaxandi suðaustanátt og skýjað, en bjart norðantil á landinu. Hiti breytist lítið. Fer að rigna sunnanlands um kvöldið.

Á laugardag (sumarsólstöður): Ákveðin suðaustanátt og rigning, en úrkomulítið norðanlands. Hiti 11 til 18 stig, hlýjast fyrir norðan.