Ríkisskattstjóri heimilar Jóni aðgang að gagnagrunni

Ríkisskattstjóri hefur heimilað aðgang Jóns Jósefs Bjarnasonar að gagnagrunni fyrirtækjaskráar en áður var lokað fyrir hann þar sem afstaða Persónuverndar til málsins lá ekki fyrir. Jón Jósef bjó til gagnagrunninn rel8 sem getur rakið flókin krosseignatengsl einstaklinga úr viðskiptalífinu. Það er fyrirtækið IT ráðgjafar- og hugbúnaðarþjónusta sem rekur forritið.

Eftir að Jón kynnti nýja forritið fyrir fjölmiðlum kom ríkisskattstjóri fram og sagði að fyrirtæki Jóns hefði ekki leyfi til þess að nota gagnagrunninn í þessum tilgangi fyrr en álit persónuverndar lægi fyrir. Þá kom einnig fram í tilkynningunni að fyrirtæki Jóns Jósefs hefði ekki skilað inn ársreikningum. Sjálfur brást Jón illa við og sakaði ríkisskattstjóra um mannorðsmorð.

Það var svo nú fyrir stundu sem ríkisskattstjóri sendi út fréttatilkynningu sem þar sem segir að álit Persónuverndar liggur fyrir. Því sé ekkert til fyrirstöðu að Jón fái aðgang að gagnagrunninum.

Svo segir í lok tilkynningarinnar orðrétt: „Þá vill ríkisskattstjóri taka fram að öll verkfæri sem nýst geta eftirlitsaðilum og þar með skattyfirvöldum til að auðvelda störf þeirra og jafnframt við að stuðla að gagnsæi í viðskiptum og til að upplýsa um krosseignatengsl, eru mikils virði."

Hér fyrir neðan má lesa tilkynningu ríkisskattstjóra:

Fréttatilkynning frá ríkisskattstjóra

Að undanförnu hefur verið til umfjöllunar á opinberum vettvangi ósk forráðamanns IT Ráðgjafar- og hugbúnaðarþjónustu ehf. um að fá aðgang að gagnagrunni fyrirtækjaskrár. Ríkisskattstjóri taldi nauðsynlegt m.t.t. eðli gagnagrunnsins og fyrirhugaðar starfsemi, að afstaða Persónuverndar þyrfti að liggja fyrir.

Nú þegar afstaða Persónuverndar er ljós ætti ekkert að vera því til fyrirstöðu að forráðamaður hlutaðeigandi félags fái umbeðinn aðgang að uppfylltum viðeigandi öryggis- og formkröfum. Reiknað er með að unnt verði að ganga frá því á næstu dögum og skráin þá gerð aðgengileg.

Þá vill ríkisskattstjóri taka fram að öll verkfæri sem nýst geta eftirlitsaðilum og þar með skattyfirvöldum til að auðvelda störf þeirra og jafnframt við að stuðla að gagnsæi í viðskiptum og til að upplýsa um krosseignatengsl, eru mikils virði.