Á fimmta tug beið bana í gær

Flugumenn al-Kaída í Írak réðu hátt settan embættismann af dögum í Bagdad í gær. Auk þess beið á fimmta tug Íraka bana í árásum víðsvegar um landið. Í Rúmeníu fögnuðu menn hins vegar frelsun þarlendra blaðamanna sem haldið hafði verið í gíslingu í tæpa tvo mánuði. Að minnsta kosti tuttugu létu lífið í tveimur sprengjutilræðum í bæ skammt frá Mosul. Þá dóu tíu þegar bíll fullur af sprengiefnum var sprengdur upp fyrir utan sjíamosku í þorpi skammt utan við Bagdad. Sjö féllu og í það minnsta áttatíu slösuðust þegar öflug bílsprengja var sprengd fyrir utan fjölfarinn veitingastað í Talibia-hverfinu um hádegisleytið í Bagdad í gær. Ekki er vitað hverjir voru að verki en handbragð árásarinnar ber keim af tilræðum fylgismanna Abu Musab al-Zarqawi sem hafa verið stórtækir í hryðjuverkum undanfarna mánuði. Menn al-Zarqawi gerðu sér hins vegar lítið fyrir í gær og skutu til bana Wael al-Rubaei, hershöfðingja sem hafði yfirumsjón með að uppræta skæruhernað og hryðjuverk í landinu, og bílstjóra hans. Al-Kaída-sellan í Írak sem al-Zarqawi leiðir lýsti verknaðinum á hendur sér í yfirlýsingu á netinu í gær. Þetta er í annað sinn á jafnmörgum dögum sem íröskum embættismanni er banað en í fyrradag var hátt settur starfsmaður viðskiptaráðuneytisins myrtur. Í bænum Tuz Khormato, skammt suður af Kirkuk, týndu fimm manns lífi þegar maður ók bifreið sinni hlaðinni sprengiefni að hópi fólks og sprengdi hana í loft upp. Þrettán særðust alvarlega. Í Kirkuk dóu tveir þegar sprengjur úr sprengjuvörpu höfnuðu á íbúðarhúsi. Meðan á öllu þessu stóð gerðu bandarískar og íraskar öryggissveitir rassíu í Abu Ghraib-hverfinu í Bagdad og handtóku 300 manns sem grunaðir eru um árásir á fangelsið illræmda sem er í hverfinu, og á veginum sem liggur til alþjóðaflugvallarins í höfuðborginni. Í Búkarest í Rúmeníu í gær fögnuðu menn innilega heimkomu þriggja blaða- og fréttamanna sem látnir voru lausir úr haldi mannræningja deginum áður. Þeim hafði verið rænt í Bagdad 28. mars síðastliðinn og kröfðust ræningjarnir að Rúmenar kölluðu hersveitir sínar heim frá Írak. Við þeim kröfum var ekki orðið en engu að síður var þremenningunum sleppt.