Fimm látnir úr hermannaveiki

Fimm Norðmenn eru látnir úr hermannaveiki sem blossaði upp í Fredrikstad í Noregi. Tuttugu og fjórir í viðbót hafa greinst með sjúkdóminn. Enn er ekki vitað hvernig hann barst milli manna. Veikin herjar á lungun og tölurnar sýna að hún dregur þriðjung þeirra veikjast til dauða. Flestir hinna smituðu og látnu voru á sjötugsaldri, búsettir á svæðinu eða höfðu dvalið þar undanfarið. Í morgun bættust átta sjúklingar við á sjúkrahúsið Östfold í Fredrikstad með einkennin: höfuðverk, beinverk, háan hita og þurran hósta. Tove Kreppen Jörgensen, lækningaforstjóri Östfold-spítala, segir að þá sjúklinga hafi læknar rannsakað og staðfest að þeir væru með hermannaveiki. Hermannaveiki smitast ekki manna á milli og grunur leikur á að smitleiðin sé loftræstikerfi eða vantsdælukerfi. Í hvaða byggingu er ekki vitað en sjúkrahúsið í Fredrikstad hefur jafnvel verið nefnt. Allt kapp er lagt á að kortleggja ferðir þeirra sem hafa smitast en það er tímafrekt verkefni. Slökkt hefur verið á loftræstikerfum á svæðinu til að hindra frekari útbreiðslu. Sjúkrastofnanir í Ósló eru í viðbragðsstöðu þar sem líkur eru taldar á að spítalinn í Fredrikstad, sem er um 80 kílómetra austur af höfuðborginni, nái ekki að anna öllum þeim sjúku. Svein Rönsen, sóttvarnalæknir í Fredrikstad, segir aðspurður hvort heilbrigðisyfirvöld muni ná stjórn á ástandinu að áður en þau finni uppruna sýkingarinnar geti þau ekki fullyrt að þau hafi fullkomna stjórn á því en unnið sé að því hörðum höndum að finna út hvar sjúklingarnir hafi smitast. Mikill ótti hefur gripið um sig meðal íbúa Fredrikstad sem leita unnvörpum til læknis til að afsanna minnsta grun um smit.