Lúðvík gagnrýnir forsætisráðherra

"Það liggur í augum uppi að málinu er engan hátt lokið," segir Lúðvík Bergvinsson, þingmaður Samfylkingarinnar, en hann ritaði grein í Morgunblaðið í gær þar sem hann fór hörðum orðum um þátttöku Halldórs Ásgrímsson forsætisráðherra í einkavæðingaferli Búnaðarbankans. Í grein sinni segir Lúðvík að þeir sem fari illa með vald sem þeim er falið eigi að dvelja annars staðar en í stjórnarráðinu, hvort sem það sé á vegum hins opinbera eða ekki. "Það er auðvitað athyglisvert í málinu að forsætisráðherra er bæði seljandi og kaupandi og fram hjá þeirri staðreynd verður ekki litið. Ekkert samfélag sem vill kenna sig við lýðræði myndi láta það yfir sig ganga að selja sjálfu sér ríkisbanka. Meira að segja má líta til þess að Rússar hafa reynt að taka á málum sem þessum hvað einkavæðinguna varðar og setja kaupendurna í steininn," segir Lúðvík. Aðspurður hvort hann sé með grein sinni að lýsa yfir vantrausti á forsætisráðherra segir Lúðvík: "Ég prísa mig sælan fyrir að þurfa ekki að verja hann." Guðni Ágústsson, landbúnaðarráðherra og varaformaður Framsóknarflokksins, segist hissa á grein Lúðvíks. "Þeir Samfylkingarmenn sem hafa nú hvað hæst og ráðast harkalega gegn forsætisráðherranum alla daga og væna hann og fjölskyldu hans um að hafa misnotað aðstöðu sína við söluna á Búnaðarbanka Íslands, líta fram hjá staðreyndum málsins. Búnaðarbankinn var seldur hæstbjóðanda. Í öðru lagi fór erlent ráðgjafafyrirtæki yfir málið. Í þriðja lagi gerði einkavæðingarnefnd þetta að tillögu sinni og í fjórða lagi þá virðist engu máli skipta hverjir fjalla um málið og túlka umræðuna sér í hag. KB banka er málið erfitt í umræðunni en fyrirtækið er eitt framsæknasta og öflugasta fyrirtæki landsins sem hefur beitt sér fyrir mikilli útrás. Halldór Ásgrímsson hefur hvergi hyglað sér og sínum," segir Guðni.