Zoolander 2 kemur brátt

Owen Wilson hefur sefað aðdáendur kvikmyndarinnar Zoolander og upplýst að það styttist í framhaldsmyndina. „Það er komið virkilega gott handrit,“ sagði gaman­leikarinn við fjölmiðla um helgina en Owen lék ofurfyrirsætuna Hansel í fyrri myndinni.

Wilson leikur reyndar á móti Ben Stiller í kvikmyndinni Little Fockers en það er þriðja myndin um Gaylord Focker og samskipti hans við tengdapabba sem er fyrrverandi CIA-maður leikinn af Robert De Niro. „Við hittumst áðan og við vorum að tala um að fara að gera aðra Zoolander-kvikmynd,“ bætti Wilson við.

Zoolander sló eftirminnilega í gegn árið 2001 en hún sagði frá frekar vitgrönnu karlmódeli, leiknu af Ben Stiller, sem reynir að hafa hendur í hári brjálaðs tísku­mógúls en sá hyggst ráða forsætisráðherra Malasíu af dögum. Fyrsta myndin halaði inn sextíu milljónir í miðasölu og tilkynnti framleiðslu­fyrirtækið Viacom í nóvember að Zoo­lander 2 myndi koma fyrr en síðar.