Eminem reynir við hvíta tjaldið á ný

Eminem hyggst hasla sér völl í kvikmyndaleik á ný og hefur að sögn vefsíðunnar thewrap.com tekið að sér hlutverk hnefaleikakappa í kvikmyndinni Southpaw sem Dreamworks ætlar að framleiða.

Kurt Sutter, þekktastur fyrir Sons of Anarchy, hefur tekið að sér að skrifa handritið. Myndin fjallar um hnefaleikakappa sem er á leið á toppinn þegar áfall dynur yfir fjölskylduna. Hann reynir síðan að blása nýjum glæðum í feril sinn til þess eins að vinna dóttur sína á sitt band.

Ekki er enn ljóst hver muni leikstýra myndinni né hvenær myndin verður frumsýnd.