Selur skó úr hvalsforhúð á 190 þúsund krónur parið

Hönnuðurinn Sruli Recht vekur jafnan athygli fyrir verk sín. Fyrir skemmstu vakti regnhlíf hans deilur og nú eru erlendir fjölmiðlar áhugasamir um skó sem hann framleiðir úr hvalaforhúð.

„Skórnir hafa vakið mikla ahygli í erlendu pressunni enda hafa ekki margir nýtt sér þennan óvanalega efnivið í hönnun. Um daginn hafði til dæmis prófessor frá Bretlandi samband við mig og vildi fá að nota myndir af skónum í fyrirlestri,“ segir Sruli Recht hönnuður um skó sem hann hannar úr hvalsforhúð. Hann bætir við að ekki sé aðalatriði að selja skóna því ef hönnunin nái athygli sé tilganginum náð.

„Við hönnuðir erum eins og skemmtikraftar og okkar hlutverk er að koma fólki á óvart. Maður er alltaf að leita að einhverju sem ekki hefur verið gert áður,“ segir Sruli um hvalsforhúðarskóna. Ekki var auðvelt verk að koma þeim í framleiðslu því það kostaði mikla rannsóknarvinnu og fyrirhöfn að nálgast hvalsreðra.

„Margir póstar og símtöl fóru fram og til baka þangað til ég fékk að lokum fullan kassa af frosnum hvalsreðrum sendan. Þá byrjaði ég að vinna leðrið í samvinnu við skósmið í Ástralíu. Forhúðin á hvölum er eina efnið á þeim sem hægt er að nota. Það er hægt að teygja hana og vinna eins og leður. Önnur húð á hvölum er eins og himnan á augum sem springur þegar hún þornar,“ segir Sruli en liturinn á skónum er náttúrulegur litur hvalsforhúðar. En eru skórnir vinsælir? „Já, ég hef selt nokkur pör og á smá lager sem hægt er að nálgast í netbúðinni minni,“ segir Sruli. Skórnir eru ekki ódýrir því parið kostar 1.200 evrur, eða tæpar 190.000 íslenskar krónur á núverandi gengi. alfrun@frettabladid.is