Lærisveinar Lampard í 16-liða úrslit

Bikarævintýri Derby County heldur áfram en B-deildarliðið vann 0-1 sigur á C-deildarliði Accrington Stanley á Crown Ground í fyrsta leik dagsins í enska bikarnum. Derby sló Southampton út í 3.umferðinni á meðan Accrington Stanley lagði Ipswich.

Eftir markalausan fyrri hálfleik kom Martyn Waghorn gestunum yfir á 78.mínútu en Derby hafði leikið manni fleiri frá því á 60.mínútu þegar Daniel Barlaser fékk að líta rauða spjaldið.

Það var þó jafnt í liðum á lokamínútunum því Jayden Bogle, varnarmanni Derby, var vikið af velli á 88.mínútu þegar hann braut á sóknarmanni Accrington sem var sloppinn í gegn.

Accrington náði ekki að jafna metin í uppbótartímanum og þar við sat. Derby því komið í 16-liða úrslitin ásamt Manchester United og Bristol City.