Enski boltinn

Borgarstjórinn í Liverpool skammar Gylfa og félaga hans í Everton

Arnar Björnsson skrifar
Gylfi Þór Sigurðsson.
Gylfi Þór Sigurðsson. Getty/Alex Davidson

Borgarstjórinn í Liverpool, Joe Anderson, er foxillur út í leikmenn Everton og segir að þeir verði að bera einhverja ábyrgð á slæmu gengi liðsins í úrvalsdeildinni. Anderson er grjótharður stuðningsmaður Everton og segir að leikmenn liðsins klæðist ekki keppnistreyju liðsins af neinu stolti.

Hann hefur hitt knattspyrnustjórann, Marco Silva, sem rekinn var í gær og segir að hann sé „fínasti náungi og eigi helminginn af taktískum mistökum og röngum ákvörðunum. En leikmenn sem fái háar fjárhæðir fyrir að spila með liðinu verði að taka sinn hluta af ábyrgðinni.

„Flestir stuðningsmennirnir yrðu sáttir ef leikmennirnir gæfu allt í leikina þrátt fyrir að leikurinn tapaðist. En það eru þeir ekki að gera. Það er eitthvað mikið að hjá félaginu, það vantar leiðtoga og leikmenn sem ekki skilja félagið eru keyptir,“ sagði Joe Anderson.

Anderson segir að það ætti að hengja upp blað með 5-2 úrslitunum í leiknum við Liverpool í búningsherberginu og segja við þá að þetta er það sem rætt er um ykkur. „Mótherjarnir vita nákvæmlega hvernig á að spila gegn liðinu, ef þeir pressa okkur þá vinna þeir okkur. Það er ekki hægt að spila samba fótbolta ef þú hefur ekki slíka menn í þínum röðum,“ sagði Joe Anderson.

Blaðamaður Liverpool Echo spurði borgarstjórann að því hver ætti að taka við liðinu?

„Það fer eftir því í hvaða átt liðið ætlar. Ef við ætlum að ráða Maurizio Pocchetino eða Rafa Benitez eigum við að skaffa þeim peninga og láta þá velja þá leikmenn sem þeir vilja nota“.

David Moyes, sem stýrði Everton í 11 ár hefur verið nefndur sem líklegur eftirmaður Silva. „Mér fannst Moess fá of harða gagnrýni og ég skil vel að hann hafi yfirgefið liðið til að taka við Manchester United. Hann var með ákveðinn leikstíl þegar engir peningar voru til og ég væri alveg til í að veðja á hann. Moys skilur félagið. Við skulum ekki alveg útiloka Duncan Ferguson, kannski kemur starfið aðeins og snemma fyrir hann. Hann er leiðtogi og kemur til greina“, segir hinn grjótharði borgarstjóri í Liverpool, Joe Anderson.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.