Elskendur mætast í efstu deild á Englandi

Ramona Bachmann, einn besti leikmaður kvennafótboltans undanfarin ár, er samkynhneigð og býr í Lundúnum ásamt kærustu sinni Alishu Lehmann sem einnig er svissnesk landsliðskona og framherji eins og Bachmann.

Bachmann var samherji Söru Bjarkar Gunnarsdóttur hjá Rosengård og Wolfsburg en hún gekk í raðir Chelsea á Englandi árið 2017. Á síðasta ári fékk hún svo kærustuna til sín þegar að West Ham nældi sér í Lehmann frá BSC YB Frauen í Sviss.

Nú þurfa þær að mæta hvor annarri í leikjum í ensku úrvalsdeildinni og mögulega bikarnum en BBC gerði skemmtilegt innslag um kærustuparið í kringum leik West Ham og Chelsea sem fram fór í nóvember á síðasta ári.

„Það er margt jákvætt við það að vera með manneskju sem gerir það sama og þú og skilur hvað þú ert að ganga í gegnum,“ segir Bachman sem er 28 ára, átta árum eldri en Lehmann en þær kynntust í landsliðsferð.

„Hún er miklu betri en ég. Þegar að ég var ung var hún átrúnaðargoðið mitt. Hún er svakaleg góð, mjög tekknísk og fljót en ég er fljótari,“ segir Lehmann og hlær og bætir við um leikinn:

„Ég er svolítið stressuð en ég held að þetta verði góður leikur. Mér mun líða mjög illa ef hún skorar.“

Svo fór að Chelsea vann leikinn, 2-0, og skoraði Ramona Bachmann bæði mörkin fyrir sitt lið. Lehmann hafði lítinn áhuga á að ræða úrslitin þegar að myndavélar BBC komu til hennar eftir leik.

„Mér líður ekki vel þessa stundina. Mig langar ekki að tala um þetta,“ sagði hún.

When you're in a relationship but play for rival football teams...

Forwards Alisha Lehmann and Ramona Bachmann know exactly how that feels.

Watch: https://t.co/129wgaUjex pic.twitter.com/daZoduKzvE

— BBC Sport (@BBCSport) February 14, 2019

Þessi tvö mörk voru tveir þriðju marka Bachmann á tímabilinu en hún er aðeins búin að skora þrjú mörk í þrettán leikjum sem telst lítið á þeim bænum. Hin tvítuga Lehmann hefur spilað vel fyrir West Ham og er með fjögur mörk í fjórtán leikjum.

Bachmann kom út úr skápnum á HM 2015 í Kanada en samkynhneigð er miklu opnara umræðuefni í kvennafótbolta heldur en karlafótbolta.

„Samband þeirra er ekkert ótrúlegt eða einsdæmi í kvennafótbolta,“ sagði Martina Voss-Tecklenburg, landsliðsþjálfari Sviss, þegar að hún var spurð út í samband framherjanna sinna í desember á síðasta ári.

Innslag BBC má sjá með því að smella hér.