Klopp getur nú teflt fram tveimur öflugum byrjunarliðum

Breiddin hefur verið smá vandamál hjá Liverpool undanfarin tímabil en hún er það ekki lengur.

Jürgen Klopp, knattspyrnustjóri Liverpool, hefur byggt upp frábæran leikmannahóp frá því að hann kom á Anfield fyrir þremur árum síðan.

Annað kvöld heimsækir Liverpool Englandsmeistara Manchester City þar sem liðið tæki stórt skref í átt að Englandsmeistaratitlinum með sigri.

Pep Guardiola er með frábæra breidd hjá Manchester City og honum tókst að gera City að meisturum á sínu öðru ári.

Jürgen Klopp tók við liði Liverpool af Brendan Rodgers í októberbyrjun eftir að hafa gert frábæra hluti með Borussia Dortmund frá 2008 til 2015.

Klopp var með þunnan leikmannahóp til að byrja með en hefur á þessum þremur árum tekist að bæta við mörgum sterkum leikmönnum.

Kaup Klopp hafa mörg gengið frábærlega upp eins og þegar hann fékk Sadio Mané frá Southampton, Georginio Wijnaldum frá Newcastle, Mohamed Salah frá Roma, Andrew Robertson frá Hull City og Virgil van Dijk frá Southampton.

Nú síðast bætti Klopp við hópinn brasilíska markverðinumn Alisson, miðjumönnunum Naby Keita og Fabinho sem og svissneska sóknarmanninum fjölhæfa Xherdan Shaqiri.

Fyrir vikið er Liverpool komið með mjög flotta breidd eins og sjá má á uppstillingu GiveMeSport hér fyrir neðan.

Einhverjir leikmannanna í þessum tveimur liðum glíma reyndar við meiðsli og eru því ekki til taks á Ethiad leikvanginum annað kvöld. Þeir ættu hinsvegar allir að vera komnir til baka þegar alvaran bankar á dyrnar í apríl og maí.

Leikur Manchester City og Liverpool hefst klukkan 20.00 annað kvöld og verður hann sýndur beint á Stöð 2 Sport.