Eigandi Manchester City á nú átta fótboltafélög

City Football Group, sem er eigandi ensku meistaranna í Manchester City, hefur bætt nýju fótboltafélagi í hópinn eftir að hafa keypt meirihluta í indversku fótboltafélagi.

Indverska súperdeildarliðið Mumbai City FC er áttunda félagið sem City Football Group á en CFG keypti 65 prósent hluta í Mumbai City.

City Football Group eignaðist Manchester City árið 2008 en þá undir merkjum Abu Dhabi United Group.

Hin félögin sem City Football Group á í eru New York City í Bandaríkjunum, Melbourne City í Ástralíu, Yokohama F Marinos í Japan, Club Atlético Torque í Úrúgvæ, Girona á Spáni og Sichuan Jiuniu í Kína.

Manchester City owner makes Mumbai City the eighth club in global portfolio https://t.co/gswykboBsg

— Guardian sport (@guardian_sport) November 28, 2019

Khaldoon al-Mubarak, stjórnarformaður City Football Group, hefur mikla trú á indversku deildinni.

„Við trúum því að þessi fjárfesting okkar muni skila Mumbai City FC miklu sem og öllum indverska fótboltanum. City Football Group hefur trú á framtíð fótboltans í Indlandi og sér mikla möguleika fyrir Mumbai City FC í framtíðinni,“ sagði Khaldoon al-Mubarak.

„Okkur hlakkar til að taka með virkum hætti þátt í samfélaginu í kringum Mumbai City fótboltafélagið og treystum á gott samstarf við aðra eigendur félagsins. Við viljum þróa félagið eins fljótt og kostur er,“ sagði al-Mubarak.

Eigandaghluti City Football Group í fótboltafélögum:

Manchester City F.C. (100%)

New York City FC (80%)

Melbourne City FC (100%)

Yokohama F. Marinos (20%)

Club Atlético Torque (100%)

Girona FC (44.3%)

Sichuan Jiuniu F.C.

Mumbai City F.C.(65%)